Амбасадар у Турцыі Глаз уручыў даверчыя граматы прэзідэнту Эрдагану

2 траўня, Позірк. Амбасадар Беларусі Анатоль Глаз уручыў даверчыя граматы прэзідэнту Турцыі Рэджэпу Таіпу Эрдагану, паведаміла 2 траўня прэс-служба Міністэрства замежных спраў.

Заяўляецца, што “пасля ўрачыстай цырымоніі адбылася асобная сустрэча” Глаза і Эрдагана “ў вузкім складзе”, на якой турэцкі лідар “асабліва адзначыў сяброўскія, даверныя адносіны” з Аляксандрам Лукашэнкам і перадаў яму “самыя цёплыя пажаданні”.

Знешнепалітычнае ведамства таксама паведаміла, што на сустрэчы абмеркаваныя “ключавыя пытанні як міждзяржаўнага, так і глабальнага парадку дня”, адзначаныя “канструктыўны і даверны характар беларуска-турэцкіх адносін, інтэнсіўнае і прадуктыўнае развіццё двухбаковага гандлёва-эканамічнага супрацоўніцтва”, разгледжаныя “міратворчыя крокі і ініцыятывы дзвюх дзяржаў, а таксама магчымыя сумесныя намаганні ў дадзеным кантэксце”.

На сайце Эрдагана падрабязнасцяў цырымоніі не прыводзіцца. Там коратка паведамляецца аб тым, што турэцкі прэзідэнт 1 траўня прыняў даверчыя граматы ад амбасадараў Беларусі, Бразіліі, Эквадора, Грузіі і В’етнама. Не прыводзіць дэталяў і вядучае турэцкае інфармагенцтва “Анадалу”.

3 сакавіка Глаз уручыў копіі даверчых грамат генеральнаму дырэктару дэпартамента пратакола Міністэрства замежных спраў Турцыі Ахмету Чэмілу Міраглу.

Глаз займаў пасаду прэс-сакратара МЗС Беларусі з сярэдзіны чэрвеня 2018 года. Пасля прызначэння амбасадарам у Турцыі 14 студзеня 2025 года ён працягваў выконваць функцыі прадстаўніка знешнепалітычнага ведамства. Напрыклад, каментаваў рэакцыю краін Захаду на мерапрыемства, якое прайшло 26 студзеня і якое афіцыйны Мінск называе “прэзідэнцкімі выбарамі”.

Эрдаган, прэзідэнт Турцыі — краіны, якая з’яўляецца членам НАТО, — павіншаваў Лукашэнку з “пераабраннем” 30 студзеня.