У красавіку 2025 года тэхагляд прайшло на 20% больш транспартных сродкаў, чым годам раней
3 траўня, Позірк. У красавіку 2025 года прадпрыемства “Белтэхагляд” выдала 188.222 дазволы на допуск транспартнага сродку да ўдзелу ў дарожным руху — на 19,9% больш, чым за той жа месяц 2024-га (156.937).
Фізічным асобам за мінулы месяц выдадзена 163.140 дазволаў (133.368; +22,3%), іх доля — 86,7% (85%).
Агулам за студзень—красавік выдадзена 611.280 дазволаў (503.753, +21,3%).
У мінулым месяцы на дарогі было дапушчана 1.311 электрамабіляў (471; рост у 2,8 раза).
Паводле даных Нацыянальнага статыстычнага камітэта, паслугі на праходжанне тэхагляду легкавых аўтамабіляў у першым квартале падаражэлі на 4,7%.
Раней “Позірк” паведамляў, што за 2024 год выдадзена 1.510.315 дазволаў — на 1,1% менш, чым за 2023 год (1.527.550).
Кантроль наяўнасці дазволу на допуск ажыццяўляецца ў тым ліку ў аўтаматычным рэжыме адмысловымі тэхнічнымі сродкамі, што маюць функцыі фота- і кіназдымкі, відэазапісу.
Згодна з ч. 4 ст. 18.11 КаАП, для ўласнікаў — фізічных асоб штраф за кіраванне транспартам без тэхагляду можа дасягаць 3 базавых велічынь (126 рублёў), юрыдычных асоб і індывідуальных прадпрымальнікаў — 10 б.в. (420 рублёў).
У 2024 годзе колькасць легкавых аўтамабіляў у жыхароў Беларусі вырасла на 2,1% (з 3.023.002 да 3.085.116), а легкавых электрамабіляў — у 3,2 раза (з 6.413 да 20.745), вынікае з праведзенага “Позіркам” аналізу даных Белстата.
У Брэсцкай вобласці колькасць легкавых аўтамабіляў у 2024 годзе вырасла на 2,8% (з 462.025 да 474.920), электрамабіляў — у 3,6 раза (з 503 да 1.791); Віцебскай — на 2% (з 337.625 да 344.410) і ў 3,5 раза (з 303 да 1.062) адпаведна; Гомельскай — на 2,3% (з 393.058 да 402.223) і ў 3,4 раза (з 408 да 1.404); Гродзенскай — на 1,8% (з 385.742 да 392.780) і ў 2,8 раза (з 488 да 1.373); Мінскай — на 2,6% (з 509.185 да 522.407) і ў 3,1 раза (з 1.488 да 4.558); Магілёўскай — на 2,3% (з 315.504 да 322.776) і ў 3,7 раза (з 260 да 973); Мінску — на 0,9% (з 619.863 да 625.600) і ў 3,2 раза (з 2.963 да 9.584).