У Гомельскай вобласці КДК выявіў прадукты з мінулым чатыры месяцы таму тэрмінам прыдатнасці

5 траўня, Позірк. Аб устанаўленні фактаў рэалізацыі ў некаторых крамах Гомельскай вобласці прадукцыі са скончаным тэрмінам прыдатнасці (ад аднаго дня да чатырох месяцаў) паведаміла прэс-служба Камітэта дзяржаўнага кантролю.

З пачатку 2025 года, адзначаецца ў рэлізе, супрацоўнікі КДК сумесна з органамі дзяржаўнага санітарнага нагляду праверылі працу больш за 90 магазінаў.

Акрамя продажу пратэрмінаваных прадуктаў выяўленыя парушэнні ўмоў захоўвання, рэалізацыі тавару без неабходных дакументаў і маркіроўкі.

У некаторых гандлёвых кропках зафіксаванае “завышэнне гранічных цэн на гародніну і надбавак (на 14-20%)”.

У асобных крамах адсутнічалі цэннікі і кантрольныя шалі; абсталяванне і памяшканні знаходзіліся ў “неналежным санітарным стане“.

Па выніках праверак недабраякасная прадукцыя “забароненая да рэалізацыі”, парушальнікі прыцягнутыя да адміністрацыйнай адказнасці.

9 красавіка Міністэрства антыманапольнага рэгулявання і гандлю (МАРГ) паведаміла, што парушэнні заканадаўства аб гандлі выяўленыя ў 77% правераных крам раздробнай сеткі “Санта”, якая належыць ТАА “Санта Рытэйл”.

25 сакавіка КДК паведамляў, што падчас праверкі ў Іванаўскім і Івацэвіцкім раёнах Брэсцкай вобласці “ў адной з крамаў прадаваўся апельсінавы нектар, тэрмін прыдатнасці якога скончыўся 184 дзён таму, і працёртыя з цукрам яблыкі з мінулым 100 дзён таму тэрмінам прыдатнасці”.

7 сакавіка стала вядома, што парушэнні заканадаўства аб гандлі і абароне правоў спажыўцоў выяўленыя ва ўсіх правераных касметычных крамах касметыкі сеткі “Летуаль“, якая належыць ТАА “ЖэнціТрэйд“.

4 красавіка паведамлялася, што ва ўсіх правераных крамах рознічнай сеткі “7 пятніц“ (належыць ТАА “Юністар груп“) выяўленыя парушэнні заканадаўства аб гандлі і абароне правоў спажыўцоў.

10 сакавіка МАРГ паведаміў, што парушэнні правілаў гандлю ўстаноўленыя амаль у кожнай трэцяй праверанай краме сеткі “Табакерка“, якая належыць СЗАТ “Энерга-Оіл“.

28 лютага МАРГ інфармаваў аб парушэннях правілаў гандлю, устаноўленых ва ўсіх правераных крамах сеткі “Хіт!”, якая належыць ТАА “Еўрагандаль”.

20 лютага ведамства паказала на парушэнні ў 96% гандлёвых аб’ектаў рознічнай сеткі “Капеечка“.

Раней МАРГ выставіў маштабныя прэтэнзіі да інтэрнет-пляцоўкі “Вайлдберыз“ і гандлёвай сеткі “Суседзі“.

У 2024 годзе завышэнне гранічных гандлёвых надбавак устаноўлена ў 9,3% правераных КДК аб’ектаў, паведаміла раней начальнік упраўлення кантролю спажывецкага рынку, сферы паслуг і за абаротам падакцызных тавараў КДК Алена Масурноўская.

Усяго за год, паводле яе слоў, ведамства правяло праверкі і маніторынг 1.412 гандлёвых аб’ектаў. “Колькасць парушэнняў заканадаўства аб цэнах зніжаецца: у 2023 годзе такія парушэнні былі выяўлены ў 12% правераных магазінаў, а ў 2022-м — у кожным чацвёртым“, — адзначыла прадстаўнік КДК.