Лукашэнка заяўляе, што ТБ-прапаганда стварае “якасны кантэнт”, які “любяць мільёны”
7 траўня, Позірк. Людзьмі з “талентам і ўнікальнымі кампетэнцыямі” назваў супрацоўнікаў тэлебачання і радыё Аляксандр Лукашэнка, віншуючы іх 7 траўня з прафесійным святам.
Паводле слоў віншавальніка, якія перадае яго прэс-служба, ТБ і радыё “фарміруюць інфармацыйны парадак дня і вядомы ў свеце вобраз суверэннай Беларусі”, а таксама “па-за часам і адлегласцяў напаўняюць <…> жыццё сэнсам і радасцю зносін”.
“Быць заўсёды ў цэнтры падзей, знаходзіць ісціну, адстойваць аб’ектыўнасць і ўменне забяспечваць надзейныя камунікацыі ва ўсіх асяроддзях — нялёгкі шлях, але менавіта ён робіць вашу працу каштоўнай і значнай для грамадства і дзяржавы”, — гаворыцца ў віншаванні.
Паводле сцвярджэння Лукашэнкі тэлевізійная і радыйная прапаганда “ствараюць якасны нацыянальны кантэнт, які глядзяць, слухаюць і любяць мільёны”.
5 траўня Лукашэнка павіншаваў з Днём друку супрацоўнікаў дзяржСМІ, назваўшы іх “сапраўднымі патрыётамі”.
Беларускія ўлады не адмаўляюць, што займаюцца цэнзураваннем інфармацыі. Міністр інфармацыі Марат Маркаў 4 траўня заявіў, што “цэнзура вельмі неабходная” і абвінаваціў Захад у “вельмі жорсткім ушчамленні свабоды слова”.
Пасля падаўлення маштабных пратэстаў супраць сфальсіфікаваных прэзідэнцкіх выбараў 2020 года і жорсткасці сілавікоў рэжым Лукашэнкі стаў метадычна знішчаць непадкантрольную яму частку медыясектара. Асноўныя незалежныя СМІ былі разгромленыя, многія іх супрацоўнікі трапілі пад крымінальны пераслед або былі вымушаныя пакінуць краіну, ратуючыся ад рэпрэсій, і аднавіць працу за мяжой.
Дзейнасць і матэрыялы незалежных СМІ рэгулярна абвяшчаюцца “экстрэмісцкімі”, за супрацоўніцтва з імі пагражае крымінальная адказнасць.
Беларуская асацыяцыя журналістаў заяўляе пра 40 прадстаўнікоў медыя, якія знаходзяцца ў няволі, падкрэсліваючы, што гэта не поўны спіс.
Інтэграцыя прапагандыстаў. Як беларускія дзяржСМІ кансалідаваліся з расійскімі ў адзіным парыве ачарніць Украіну
Апублікавана на адкрытай версіі "Позірку" 21 красавіка 2025 года ў 10:50 У 2020 годзе рэжым Аляксандра Лукашэнкі, сутыкнуўшыся з масавымі пратэстамі і заходнім санкцыйным ціскам, знайшоў паратунак у Расіі. Расцягнутая да гэтага ледзь не на дзесяцігоддзі інтэграцыя з суседняй краінай …