Кіраўнік пагранслужбы Польшчы абмеркаваў з амбасадарам Пакістана сітуацыю на мяжы з Беларуссю
7 траўня, Позірк. Сітуацыю на польска-беларускай мяжы абмеркавалі 6 траўня галоўнакамандуючы Пагранічнай аховы Польшчы генерал-маёр Роберт Баган і амбасадар Пакістана ў Варшаве Мухамад Самі-ур-Рэхман. Пра гэта паведамляе польскае памежнае ведамства.
Падкрэсліваецца, што “асаблівая ўвага была нададзена праблемам, звязаным з нелегальнай міграцыяй”. “Абодва бакі запэўнілі ў гатоўнасці падтрымліваць узаемныя кантакты і заявілі пра гатоўнасць да далейшага супрацоўніцтва”, — адзначаецца ў паведамленні.
Мінск і Ісламабад дамовіліся выпрацаваць механізм для прыезду ў Беларусь працоўных мігрантаў з Пакістана, заявіў Аляксандр Лукашэнка 11 красавіка па выніках сустрэчы з пакістанскім прэм’ер-міністрам Шахбазам Шарыфам. Паводле яго слоў, Беларусь гатовая прыняць на працу 100–150 тыс. пакістанскіх спецыялістаў: “Тых галін, пра якія мы папросім”. “Кіраўніцтва Пакістана дапаможа нам падабраць такіх людзей”, — заявіў ён.
На суботніку 12 красавіка Лукашэнка адзначыў, што Беларусь зацікаўленая “перш за ўсё ў прыцягненні спецыялістаў, а не проста моладзі”. “І лепш — сем’ямі. Калі сям’я прыехала, яны працаваць будуць”, — падкрэсліў спікер, дадаўшы, што “падыход будзе дыферэнцыраваным”.
Па вяртанні з Беларусі Шарыф заявіў журналістам, што “дасягнутая дамоўленасць з Беларуссю аб накіраванні 150 тыс. кваліфікаваных пакістанскіх спецыялістаў, якія будуць адабраны выключна па заслугах”.
25 красавіка Лукашэнка на нарадзе аб развіцці раёнаў Гомельскай вобласці, пацярпелых у выніку катастрофы на ЧАЭС, заявіў, што “зацікаўленыя” хочуць “узрушыць беларускае грамадства” праблемай мігрантаў, у прыватнасці, тэмай прыезду ў Беларусь работнікаў з Пакістана.
23 красавіка Міністэрства ўнутраных спраў паведаміла, што выяўленыя “актыўныя правакатары, якія наўмысна спрабавалі нагнятаць абстаноўку ў краіне і маніпуляваць грамадскай думкай”, распаўсюджваючы інфармацыю аб уездзе ў Беларусь 150 тыс. грамадзян Пакістана.
Паводле сцвярджэння ведамства, “міграцыйныя патокі з Пакістана адсутнічаюць, роўна як і злачынствы, учыненыя выхадцамі з гэтай дзяржавы”.
Пры гэтым падкрэслівалася, што на розных інтэрнэт-рэсурсах “працягвае распаўсюджвацца фэйкавая і правакацыйная інфармацыя на тэму ўезду ў Беларусь 150 тыс. грамадзян Пакістана, якія здзейснілі шэраг злачынстваў”.
“За распальванне міжнацыянальнай варожасці і дэстабілізацыю сітуацыі ў рэспубліцы будуць ужытыя самыя строгія меры адказнасці, аж да крымінальнай”, — прыгразіла МУС.
З 2021 года на межах Беларусі і краін ЕС працягваецца міграцыйны крызіс. У ліку мігрантаў, якія спрабуюць нелегальна трапіць у краіны Еўрасаюза, ёсць і грамадзяне Пакістана.
Амбасада Павістана ў Польшчы акрэдытаваная таксама на працу з краінамі Балтыі.