Ціханоўская: 9 Траўня ў Беларусі спрабуюць ператварыць у яшчэ адно шоу

9 траўня, Позірк. 9 Траўня ў Беларусі спрабуюць ператварыць у яшчэ адно шоу з гучнымі лозунгамі і ваеннай тэхнікай, заявіла Святлана Ціханоўская ў відэазвароце з нагоды 80-годдзя перамогі над нацысцкай Германіяй.

“У гэты дзень усе чакаюць пафасных заяваў і гучных словаў. Але кожны год 9 траўня я адчуваю сябе вельмі няёмка ад гэтай штучнасці. Бо для мяне гэты дзень — ён не пра лозунгі, парады альбо прамовы на камеру. Ён больш пра памяць і цішыню. Пра шчырую размову ў сям’і, бо ў кожнай — свая гісторыя страты і болю”, — адзначыла дэмакратычны лідар.

Паводле яе слоў, Другая сусветная вайна — гэта боль, які мусіць нагадваць, што вайна ніколі не павінна быць сродкам вырашэння праблем.

“Мір не нараджаецца ў маршах. Мір — у нашай памяці, у спачуванні, у клопаце пра блізкіх і адно аднаго”, — падкрэсліла палітык.

Ціханоўскай “асабліва балюча глядзець, як гэты дзень цяпер выкарыстоўваюць для апраўдання новай вайны, для маніпуляцыяў і рэпрэсій”. “І ўлада карае людзей, якія маюць смеласць сказаць “Не вайне”. Але менавіта так — словамі “Не вайне!” — намагаемся пазбегнуць памылак мінулага”, — сказала яна.

На перакананне дэмлідара, у беларусаў памяць пра Другую сусветную вайну жыве дагэтуль, таму яны “катэгарычна не прымаюць заваёўніцкіх войн і імперскіх амбіцый — што і ёсць галоўнай прычынай таго, што двум дыктатарам не ўдалося ўцягнуць у расійскую агрэсію супраць Украіны беларускі народ”.

Ціханоўская пажадала “ўсім — міру, беларусам — свабоды, а Украіне — перамогі”.