Беларусь выйшла на другое месца ў ЕАЭС паводле дарагоўлі бензіну

13 траўня, Позірк. Паводле дарагоўлі бензіну Беларусь у першым квартале 2025 года заняла другое месца ў Еўразійскім эканамічным саюзе (ЕАЭС), вынікае з праведзенага “Позіркам” аналізу штоквартальных даных аддзела галіновай і сацыяльна-дэмаграфічнай статыстыкі Еўразійскай эканамічнай камісіі (ЕЭК).

У 2024 годзе Беларусь па выніках студзеня — сакавіка знаходзілася на другім месцы, студзеня — чэрвеня, ліпеня — верасня, кастрычніка — снежня — на трэцім.

Самы дарагі бензін у сакавіку быў у Арменіі — 1,35 долара за літр (у снежні 2024-га — 1,33; +3,8%). Далей Беларусь — 0,77 (0,69; +11,6%), Кыргызстан — 0,74 (0,75; -1,3%), Расія — 0,69 (0,59; +16,9%), Казахстан — 0,41 (0,39; +5,1%).

Цяпер цэны за адзін літр у Беларусі складаюць:

• бензін АІ-92-К5-Еўра — 2,5 рубля;
• АІ-95-К5-Еўра — 2,6 рубля;
• АІ-98-К5-Еўра — 2,82 рубля;
• дызельнае паліва — 2,6 рубля.