У Беларусі “не навучыліся на 100%” збіваць беспілотнікі, заявіў Лукашэнка, прызнаўшы, што дроны могуць залятаць і з боку РФ
Дрон, які ўпаў у Мінску (ліпень 2025 года)
12 студзеня, Позірк. Беларусь практычна акружаная вайсковымі падраздзяленнямі з усіх бакоў, заявіў Аляксандр Лукашэнка 12 студзеня ў Мінску на сустрэчы са старшынёй Дзяржаўнага пагранічнага камітэта Канстанцінам Моластавым ды іншымі сілавікамі, зацвярджаючы рашэнні на ахову дзяржмяжы ў 2026 годзе.
“Адзінае акно на ўсходзе з Расійскай Федэрацыяй, дзе ў нас крыху лягчэй, — цытуе палітыка яго прэс-служба. — Але я б не сказаў, асабліва ў сувязі з апошнімі падзеямі ва Украіне, калі невядома адкуль і незразумела адкуль могуць заляцець на тваю тэрыторыю беспілотнікі. Скажам шчыра, і мы не навучыліся яшчэ на 100% рэагаваць на гэтыя ўсе залёты і не навучыліся іх на 100% знішчаць. Не ведаю, ці магчымыя гэтыя 100%. Але да гэтага трэба нам імкнуцца”.
СМІ перыядычна паведамляюць пра ўварванне ў паветраную прастору Беларусі беспілотнікаў, якімі, як мяркуецца, Расія наносіць удары па Украіне.
Напрыклад, напрыканцы ліпеня 2025 года партал “Люстэрка” са спасылкай на відавочцаў паведаміў, што каля 2:00 дрон урэзаўся ў шматпавярховы дом у Фрунзенскім раёне сталіцы, упаў на прыпаркаваны аўтамабіль і выбухнуў. Прыкладна праз гадзіну пасля з’яўлення інфармацыі ў медыя Міністэрства абароны прызнала факт падзення беспілотніка.
Пазней Следчы камітэт паведаміў, што беспілотнік, які ўпаў, быў начынены тратылам і вялікай колькасцю паражальных элементаў, узбуджаная крымінальная справа. СК пацвердзіў, што рэшткі беспілотніка пашкодзілі некалькі прыпаркаваных аўтамабіляў і прызямліліся на прылеглую да дома тэрыторыю.
На пачатку жніўня таго ж года рэгіянальнае выданне “Флагшток” паведаміла, што жыхароў дамоў у прыватным сектары ў Рэчыцы (Гомельская вобласць) эвакуявалі праз беспілотнік, які ўпаў.
Ад пачатку года ў Брэсцкай вобласці 42 разы выяўлялі зваленыя беспілотнікі ды іх складовыя часткі — BelPol
8 снежня, Позірк. "Ад пачатку 2025 года на тэрыторыі Брэсцкай вобласці зафіксаваныя 42 выпадкі выяўлення БПЛА і іх складовых частак", — гаворыцца ў апублікаваным аб'яднаннем BelPol дакуменце, які прадстаўлены як рашэнне пасяджэння каардынацыйнай нарады, што прайшла 5 снежня ў Брэсцкім …
