Кіроўца аўтобуса, па віне якога ў леташнім ДТЗ пацярпелі 52 чалавекі, прыгавораны да трох гадоў пазбаўлення волі

13 траўня, Позірк. Суд Заводскага раёна Мінска прызнаў вінаватым вадзіцеля рэйсавага аўтобуса, па віне якога ў красавіку 2024 года адбылося дарожна-транспартнае здарэнне з дзясяткамі пацярпелых, паведамляе прэс-служба сталічнай пракуратуры.

Аварыя адбылася на маршруце “Сокал — аўтастанцыя “Аўтазаводская” на Смілавіцкім тракце ў сталіцы.

Паводле даных абвінавачання, вадзіцель, парушыўшы правілы дарожнага руху, сутыкнуўся з грузавіком, што стаяў: “У выніку ДТЗ не менш за 52 пасажыры аўтобуса атрымалі пашкоджанні рознай ступені цяжкасці, пры гэтым у васьмі з іх устаноўлены цяжкія цялесныя пашкоджанні, у аднаго — цяжкія і менш цяжкія цялесныя пашкоджанні”.

Раней фігурант адбываў пакаранне за здзейсненае ў 2002 годзе аналагічнае злачынства, судзімасць за якое пагашаная.

На падставе ч. 2 арт. 317 КК (парушэнне правілаў дарожнага руху або эксплуатацыі транспартных сродкаў) падсудны прыгавораны да трох гадоў пазбаўлення волі з пазбаўленнем права займацца дзейнасцю, звязанай з кіраваннем транспартнымі сродкамі, тэрмінам на пяць гадоў.

Прыгавор у законную сілу не ўступіў, можа быць абскарджаны і апратэставаны ў апеляцыйным парадку.

Раней “Позірк” паведамляў, што агульная колькасць аўтамабільных аварый у Беларусі ў 2024 годзе павялічылася на 8,8% у параўнанні з 2023-м (з 3.173 да 3.453). Загінула ў гадавым вымярэнні на 0,5% менш чалавек (434 супраць 436). Сітуацыя па рэгіёнах наступная:

Брэсцкая вобласць: +13,2% аварый (507 супраць 448) і +16,9% загінулых (76 супраць 65);

Віцебская вобласць: +4,7% аварый (405 супраць 387) і +32,7% загінулых (65 супраць 49);

Гомельская вобласць: –1,9% аварый (424 супраць 432) і +3,1% загінулых (66 супраць 64);

Гродзенская вобласць: +9% аварый (339 супраць 311) і +12,8% загінулых (44 супраць 39);

Мінская вобласць: +5,4% аварый (685 супраць 650) і –22,8% загінулых (115 супраць 149);

Магілёўская вобласць: +19,7% аварый (449 супраць 375) і +17,4% загінулых (54 супраць 46);

Мінск: +13% аварый (644 супраць 570) і –41,7% загінулых (14 супраць 24).