Памерла 45-гадовая экс-палітзняволеная Тамара Каравай, яе асудзілі за лайк у “Аднакласніках”
14 траўня, Позірк. Пра смерць 45-гадовай былой палітзняволенай Тамары Каравай паведаміла са спасылкай на яе знаёмых выданне “Наша Ніва”.
Дата смерці невядомая, прычына — “не вытрымала сэрца”.
Каравай была затрыманая 5 студзеня 2023 года. Суд у Лунінцы (Брэсцкая вобласць) 29 сакавіка прыгаварыў яе да 2 гадоў пазбаўлення волі паводле арт. 367 Крымінальнага кодэкса (паклёп у дачыненні да прэзідэнта). Прычынай пераследу стаў лайк, пастаўлены пад крытычнай публікацыяй пра Аляксандра Лукашэнку ў сацсетцы “Аднакласнікі”.
Выйшла на волю па памілаванні 20 жніўня 2024 года незадоўга да заканчэння тэрміну зняволення.
12 траўня паведамлялася пра смерць былой палітзняволенай Ганны Кандраценка з прычыны анкалагічнага захворвання. Гэта адбылося 5 лютага гэтага года. Жанчыне было 39 гадоў.
22-гадовы палітвязень, грамадзянін Расіі Дзмітрый Шлетгаўэр памёр у магілёўскай калоніі 11 кастрычніка 2024 года, вядома пра гэта стала 1 лістапада.
Каментуючы гэты факт, афіцыйны прадстаўнік Еўрапейскай службы знешніх дзеянняў (ЕСЗД) Петэр Стана заявіў, што смерць чарговага палітвязня ў Беларусі дэманструе “бесчалавечную прыроду” рэжыму Аляксандра Лукашэнкі.
Акрамя Шлетгаўэра, у 2022–2024 гадах у беларускіх месцах несвабоды памерла яшчэ не менш за шэсць чалавек, якіх беларускія праваабарончыя арганізацыі прызнавалі палітычнымі зняволенымі.
Гэта Вітольд Ашурак, Мікалай Клімовіч, Алесь Пушкін, Вадзім Храсько, Ігар Леднік і Аляксандр Кулініч.
Усяго з 2020 года мінімум 8.234 чалавекі трапілі пад крымінальны пераслед паводле палітычных матываў, у дачыненні да не менш за 6.940 з іх вынесеныя прыгаворы, не менш за 33 накіраваныя на прымусовае лячэнне, гаворыцца ў апублікаваным 6 траўня аглядзе праваабарончага цэнтра “Вясна”.
На 12 сакавіка 2025 года праваабаронцы мелі інфармацыю пра не менш за 219 палітвязняў, якія знаходзяцца за кратамі “ў асаблівай рызыцы”. Мінімум 78 чалавек маюць цяжкія захворванні, 8 — інваліднасць, 10 — ментальныя разлады, 32 — старэйшыя за 60 гадоў (многія з іх таксама маюць праблемы са здароўем).