Толькі ў 15 раёнах Беларусі дазволена свабодна наведваць лясы

14 жніўня, Позірк. У 15 з 118 раёнаў Беларусі дазволена свабодна наведваць лясы, сведчыць інтэрактыўная карта на сайце Міністэрства лясной гаспадаркі.

Абмежаванняў няма ў сямі раёнах Віцебскай вобласці — Верхнядзвінскім, Расонскім, Гарадоцкім, Віцебскім, Лёзненскім, Лепельскім і Чашніцкім.

Таксама свабодна наведваць лясы можна ў Хоцімскім і Касцюковіцкім раёнах (абодва — Магілёўская вобласць), Любанскім і Салігорскім (абодва — Мінская), а таксама ў Лоеўскім, Гомельскім, Веткаўскім і Добрушскім (усе — Гомельская).

Забаронена наведваць лясы ў 21 раёне. У Гомельскай вобласці гэта Нараўлянскі раён, Ельскі, Мазырскі, Жыткавіцкі, Петрыкаўскі, Калінкавіцкі, Рэчыцкі, Кастрычніцкі, Светлагорскі, Жлобінскі, Буда-Кашалёўскі, Чачэрскі, Кармянскі і Рагачоўскі, у Брэсцкай — Столінскі, у Мінскай — Слуцкі і Барысаўскі, у Магілёўскай — Слаўгарадскі, Чэрыкаўскі і Мсціслаўскі, у Віцебскай — Сенненскі.

У астатніх 82 раёнах дзейнічаюць абмежаванні, пры якіх у лясы нельга заязджаць на аўтамабілі і разводзіць там вогнішчы, але даступныя пешыя прагулкі, збор ягад і грыбоў.