Справа групы “Дух Русі” перададзена ў суд, абвінавачаным інкрымінавана восем артыкулаў КК

14 траўня, Позірк. Пракуратура Гомельскай вобласці накіравала ў суд крымінальную справу ў дачыненні да васьмі ўдзельнікаў групы “Дух Русі”, прызнанай у снежні 2024 года “экстрэмісцкім фарміраваннем”, паведамляе прэс-служба нагляднага ведамства.

Абвінавачаным інкрымінуецца восем артыкулаў Крымінальнага кодэкса: ч. 1, 3 арт. 130, ч. 1, 3 арт. 130¹, ч. 2 і 3 арт. 339, ч. 1, 2, 3 арт. 361¹, ч. 1 арт. 368, ч. 1, 2, 3 арт. 203¹, ч. 1 арт. 289¹, ч. 1 арт. 290⁴.

Група дзейнічала ў Мазыры.

Заяўляецца, што шасцёра абвінавачаных уваходзілі ў групу з лістапада 2023 года па люты 2024-га, былі непаўналетнімі. Яны, як сцвярджае следства, стварылі мноства каналаў і груп у месенджары “Тэлеграм”, з дапамогай якіх “распальвалі нянавісць у дачыненні да выхадцаў з Каўказа і Сярэдняй Азіі, іншых грамадзян, якія, на іх думку, адносіліся да непаўнавартасных”. Таксама фігуранты размяшчалі публікацыі,“накіраваныя на прапаганду і рэабілітацыю нацызму, абражалі прэзідэнта Рэспублікі Беларусь”.

Акрамя гэтага, двое абвінавачаных “сумесна з іншымі неўстаноўленымі асобамі” ў гэты ж перыяд аб’ядналіся ў групу “Арганізацыя“ Перт”, прызнаную “экстрэмісцкім фарміраваннем” у студзені 2025 года. Яны таксама стварылі каналы і чаты ў “Телеграме”, дзе “распальвалі нянавісць у дачыненні да супрацоўнікаў міліцыі і іншых грамадзян, прапагандавалі тэрарызм, размяшчалі дапаможнікі па вырабе саматужным спосабам зброі, выбуховых рэчываў, самаробных выбуховых прылад”. Публікаваліся таксама матэрыялы, “накіраваныя на ўслаўленне нацысцкіх злачынцаў, дыскрэдытацыю Рэспублікі Беларусь”.

У паведамленні гаворыцца, што ў перыяд са снежня 2023 года да красавіка 2024-га фігуранты, “кіруючыся ідэалогіяй нацызму, учынілі шэраг экстрэмісцкіх акцый, спалучаных з нападамі на грамадзян з выкарыстаннем біт, нажоў, балончыкаў з пярцовай вадкасцю і іншых прыстасаванняў і сродкаў”.

Адзін з абвінавачаных “ажыццяўляў дзейнасць па стварэнні баявой тэрарыстычнай арганізацыі: з дапамогай інфармацыйных рэсурсаў сеткі інтэрнэт ажыццяўляў пошук выканаўцаў для здзяйснення тэрарыстычных актаў у перыяд правядзення электаральнай кампаніі выбараў прэзідэнта Рэспублікі Беларусь у 2025 годзе”, гаворыцца ў паведамленні.

Шасцёра з васьмі абвінавачаных знаходзяцца пад вартай.

Даведка “Позірку”:

арт. 130 — распальванне расавай, нацыянальнай, рэлігійнай альбо іншай сацыяльнай варожасці або варажнечы;

арт. 130¹ — рэабілітацыя нацызму;

арт. 339 — хуліганства;

арт. 361¹ — стварэнне экстрэмісцкага фарміравання альбо ўдзел у ім;

арт. 368 — абраза прэзідэнта;

арт. 203¹ — незаконныя дзеянні ў дачыненні да інфармацыі аб прыватным жыцці і персанальных даных;

арт. 289¹ — прапаганда тэрарызму;

арт. 290⁴ — стварэнне арганізацыі для ажыццяўлення тэрарыстычнай дзейнасці альбо ўдзел у ёй.