Ціханоўская абмеркавала са спікерам КР Бруханам знікненне Мельнікавай
25 траўня, Позірк. Пра сустрэчу дэмакратычнага лідара Святланы Ціханоўскай са спікерам Каардынацыйнай рады (КР) Арцёмам Бруханам паведамляе Аб’яднаны пераходны кабінет (АПК).
Палітык павіншавала Брухана з абраннем на пасаду, “выказала словы падтрымкі Каардынацыйнай радзе”, адзначыўшы “важнасць гэтага інстытута дэмакратычных сіл, які павінен быць суб’ектам транзіту ўлады ў Беларусі”, адзначае АПК.
“Падчас сустрэчы таксама абмеркаваная сітуацыя з [экс-спікерам КР] Анжалікай Мельнікавай, яе магчымыя і рэальныя наступствы, неабходныя меры па ўмацаванні бяспекі дзейнасці дэмакратычных сіл у цэлым і Каардынацыйнай рады, у прыватнасці”, — гаворыцца ў паведамленні.
Таксама на сустрэчы абмяркоўваліся “арганізацыя і правядзенне слуханняў у Каардынацыйнай радзе, падчас якіх Аб’яднаны пераходны кабінет зробіць справаздачу напярэдадні канферэнцыі “Новая Беларусь”.
Паводле слоў Брухана, цяпер у КР “абмяркоўваюцца планы па слуханнях праектаў канцэпцый аб люстрацыі і інстытуце ўпаўнаважанага па правах чалавека”. Таксама камісія па рэформах КР “плануе прапанаваць дэлегатам паўдзельнічаць у далейшай распрацоўцы законапраектаў новай Беларусі”.
“Сярод міжнародных планаў — працяг удзелу дэлегацыі Каардынацыйнай рады ў дзейнасці ПАСЕ і Кангрэсе мясцовых уладаў, а таксама міжпарламенцкае супрацоўніцтва”, — падкрэсліў АПК.
34-гадовы Брухан быў абраны спікерам КР 14 траўня, значна апярэдзіўшы па колькасці набраных галасоў свайго адзінага апанента — 51-гадовага экс-бізнесмэна, прадстаўніка фракцыі “Беларусы” Аляксандра Кныровіча.
Брухан з’яўляецца членам фракцыі “Каманда Латушкі і Рух “За Свабоду” ў КР, а таксама супрацоўнікам Народнага антыкрызіснага ўпраўлення, якое ўзначальвае намеснік кіраўніка АПК Павел Латушка. У Беларусі працаваў у Брэсцкім аблвыканкаме.
Ранейшы спікер КР Анжаліка Мельнікава, аб знікненні якой стала вядома ў канцы сакавіка, таксама ўваходзіла ў фракцыю, якую ўзначальвае Латушка.
Расследвальнік The Insider Грозеў: Упэўнены, мы ўстановім, дзе фізічна знаходзіцца Мельнікава
24 траўня, Позірк. Упэўненасць у тым, што месцазнаходжанне экс-спікера Каардынацыйнай рады (КР) неўзабаве будзе ўстаноўлена, выказаў у эфіры тэлеканала "Дождж" журналіст-расследвальнік выданняў The Insider і Der Spiegel Хрыста Грозеў. Мельнікава знікла "дзесьці ў сакавіку гэтага года", адзначыў ён, дадаўшы, то …
