З несезонных харчовых тавараў у 2025 годзе патаннелі толькі соль, аліўкавы алей, сыравэнджаная і сыравяленая каўбаса
29 траўня, Позірк. Соль, аліўкавы алей, а таксама сыравэнджаная і сыравяленая каўбаса — адзіныя харчовыя несезонныя тавары, якія патаннелі за чатыры месяцы 2025 года, сведчыць праведзены “Позіркам“ аналіз звестак Белстата.
Зніжэнне цэн нязначнае: аліўкавы алей патаннела на 0,28%, соль — на 0,17%, сыравэнджаная і сыравяленая каўбаса — на 0,13%.
Сярод сезонных харчовых тавараў знізіліся кошты толькі на салодкі перац (-16,68%), агуркі (-14,48%), часнок (-7,29%), сухафрукты (-2,72%) і цытрусавыя (-0,41%).
Лідэры па падаражэнні:
сярод несезонных харчовых тавараў: какава-парашок (+25,30%), салёны селядзец (+17,27%), шакалад (+14,19%), натуральная молатая кава (+13,79%) і цукеркі, глазураваныя кандытарскай глазурай (тыпу “Цытрон”, “Дзецям”) (+12,14%);
сярод сезонных: белакачанная капуста (+49,46%), морква (+34,80%), бульба (+33,21%), буракі (+28,82%), яблыкі (+27,11%).
