Выпадкі падзення дрэў з-за непагадзі зафіксаваныя ва ўсіх рэгіёнах Беларусі, акрамя Брэсцкай і Гомельскай абласцей

30 чэрвеня, Позірк. Выпадкі падзення дрэў з-за непагадзі 29–30 чэрвеня зафіксаваныя ва ўсіх рэгіёнах Беларусі, акрамя Брэсцкай і Гомельскай абласцей, вынікае з паведамлення Міністэрства па надзвычайных сітуацыях.

У Віцебскай вобласці супрацоўнікі ведамства 16 разоў выязджалі для “распілоўкі і ўборкі аварыйных дрэў” у пяці рэгіёнах: у Полацкім, Гарадоцкім, Шумілінскім і Аршанскім раёнах і Віцебску, гаворыцца ў паведамленні.

У Магілёўскай вобласці здзейснена 13 аналагічных выездаў у Магілёўскім, Чавускім, Крычаўскім, Асіповіцкім, Бабруйскім, Круглянскім раёнах і Магілёве.

Выпадкі падзення дрэў зафіксаваныя ў Мінскай вобласці. У Барысаве дрэва, якое ўпала, пашкодзіла два легкавыя аўтамабілі. Супрацоўнікі МНС выязджалі на ўборку дрэў у Бярэзінскім, Барысаўскім, Крупскім, Мінскім і Салігорскім раёнах.

У Гродзенскай вобласці, як паведамляецца, “ратавальнікі тройчы аказвалі дапамогу ў распілоўцы паваленых на праезную частку дрэў”.

Адзначаецца, што прадстаўнікі ведамства “працягваюць ліквідаваць наступствы непагадзі”.

29 чэрвеня ад штармавога ветру ў Беларусі пацярпелі тры чалавекі. У Мінску ў выніку падзення галінкі на тэрыторыі Цэнтральнага батанічнага саду Нацыянальнай акадэміі навук два чалавекі атрымалі траўмы. Яшчэ адзін чалавек пацярпеў у Маладзечне (Мінская вобласць).

Раней МНС паведаміў, што ў Ждановічах (Мінскі раён) дрэва, якое ўпала, пашкодзіла легкавы аўтамабіль.

Пра ўзмацненне ветру 29 і 30 чэрвеня да 15–20 метраў у секунду раней папярэджваў Белгідрамет. Паводле інфармацыі метэаролагаў, днём 1 ліпеня ў многіх раёнах Беларусі таксама чакаецца ўзмацненне паўночна-заходняга ветру парывамі 15–20 м/с.