У Магілёве зарэгістравана больш за 4,7 тыс. паваленых дрэў — МНС

11 ліпеня, Позірк. У выніку ўрагану на вуліцах Магілёва павалены дрэвы, пашкоджаны электрычныя сеткі ў прыватным сектары, дахі дамоў і аўтамабілі, паведаміў начальнік гарадскога аддзела па надзвычайных сітуацыях Вячаслаў Башарымаў, піша рэгіянальнае дзяржСМІ mogilevnews.by.

З 02:00 да 03:30 10 ліпеня вобласць апынулася ў эпіцэнтры моцнага шторму, вецер дасягаў 26 м/с, што класіфікуецца як надзвычайная сітуацыя, удакладніў ён.

Паводле слоў прадстаўніка МНС, на гарачую лінію 101 паступіла каля 4,2 тыс. зваротаў, “што сведчыць пра маштабы бедства”: “Паводле папярэдняй інфармацыі, у выніку стыхіі пашкоджана 238 дахаў, з якіх 109 — прыватныя дамы, 80 — шматкватэрныя будынкі, а 38 — установы адукацыі. Зафіксавана 395 выпадкаў падзення дрэў на праезныя часткі, дамы і аўтамабілі. Усяго зарэгістравана 4.776 паваленых дрэў”.

Падраздзяленні МНС здзейснілі 502 выезды для прыбірання ўпаўшых дрэў і расчысткі праезнай часткі, прыбралі 962 дрэвы, вызвалілі 35 дахаў, у тым ліку 15 дахаў адукацыйных устаноў. З выкарыстаннем аўтакранавай тэхнікі і пад’ёмнікаў было вызвалена два дахі — жылога дома і дзіцячага садка.

У ліквідацыі наступстваў удзельнічаюць 23 адзінкі тэхнікі МНС і 117 спецыялістаў. Працуюць 28 брыгад з бензапіламі, а таксама спецыяльная тэхніка, паведамляецца ў рэлізе.

“Вядзецца бесперапынны маніторынг аператыўнай абстаноўкі і наладжана ўзаемадзеянне ўсіх аварыйных службаў. Падраздзяленні Магілёўскага гарадскога аддзела па НС працягнуць аварыйна-аднаўленчыя працы да поўнай ліквідацыі наступстваў стыхіі, працуючы на карысць жыхароў горада і іх бяспекі”, — заявіў прадстаўнік МНС.

10 ліпеня падзенне дрэва падчас непагадзі прывяло да гібелі жанчыны ў Магілёве, гэта адбылося каля 2 гадзін ночы на рацэ Днепр. 32-гадовая жанчына разам з мужам напярэдадні вечарам прыехала на рыбалку.

У Мінлясгасе паведамлялі, што адным з найбольш пацярпелых ад непагадзі стаў Клімавіцкі лясгас (Магілёўская вобласць). Там пацярпела каля 300 гектараў лесу, сітуацыя патрабуе “правядзення суцэльных санвысечак”.

Паводле інфармацыі Міністэрства энергетыкі, на 14:00 “узмоцненыя працы” для аднаўлення электразабеспячэння працягваліся ў 55 населеных пунктах.

13 і 14 ліпеня 2024 года непагадзь прывяла да маштабных пашкоджанняў у сістэме электраперадачы, парушэння водазабеспячэння і іншых разбурэнняў. Найбольш ад ветру пацярпела Гомельская вобласць, дзе ўводзіўся рэжым надзвычайнай сітуацыі. Загінулі сем чалавек.

Лукашэнка абвінаваціў грамадзян, што пацярпелі ад непагадзі, у “няправільным разуменні” НС.