У Іванаўскім раёне перакулілася маршрутка, у ДТЗ пацярпела сем чалавек
27 ліпеня, Позірк. Аб дарожна-транспартным здарэнні ў Брэсцкай вобласці з удзелам маршрутнага таксі паведамляе прэс-служба Міністэрства ўнутраных спраў.
“Сёння каля 15:10 у Іванаўскім раёне на 465-м кіламетры аўтадарогі М-10 “Мяжа РФ — Гомель — Кобрын” 47-гадовы кіроўца, кіруючы мікрааўтобусам Mercedes, рухаўся па маршруце “Іванава — Гродна”. Паводле папярэдняй інфармацыі, пры выкананні абгону мужчына не справіўся з кіраваннем і з’ехаў у левы па ходзе руху кювет, дзе маршрутка перакулілася”, — гаворыцца ў паведамленні.
Сем пасажыраў дастаўленыя ва ўстанову аховы здароўя, адзначае МУС.
На месцы ДТЗ працуюць супрацоўнікі Дзяржаўтаінспекцыі і следча-аператыўная група.
“Пры руху падчас ападкаў кіроўцам варта быць асабліва асцярожнымі, баяцца страты кантролю над транспартным сродкам, загадзя зніжаць хуткасць, пазбягаць рэзкіх манеўраў”, — падкрэслівае ведамства.
Раней паведамлялася, што 68-гадовая пасажырка маршрутнага таксі шпіталізаваная ў выніку аварыі, якая адбылася ўвечары 9 ліпеня ў цэнтры Мінска.
ДТЗ з удзелам маршрутнага таксі здарылася 27 траўня ў Смалявіцкім раёне (Мінская вобласць) на 10-м кіламетры аўтадарогі Р53. Рухаючыся са Смалявічаў у Мінск, маршрутка ўрэзалася ў агароджу і перакулілася.
На момант ДТЗ у мікрааўтобусе знаходзілася дзесяць чалавек. “Трое пасажыраў не пацярпелі, яшчэ чацвёра пасля агляду медыкамі адпушчаныя дадому. Кіроўца і два пасажыры цяпер у бальніцы з траўмамі рознай ступені цяжкасці”, — паведамілі ў МУС.
20 траўня паведамлялася, што ў выніку аварыі з удзелам маршруткі ў Гродне пацярпела сем чалавек.
12 лютага паведамлялася аб пяці пацярпелых у ДТЗ з удзелам маршруткі ў Мінску. Усіх траўмаваных брыгады хуткай дапамогі даставілі ў бальніцы, дзе “пасля правядзення дыягностыкі” яны былі шпіталізаваны.
Адзначалася, што ў пацярпелых спалучаныя траўмы рознай ступені цяжкасці. Былі праведзеныя аператыўныя ўмяшанні.
Паводле інфармацыі мінскай Дзяржаўтаінспекцыі, 12 лютага прыкладна ў 14:40 21-гадовы кіроўца аўтамабіля “ГАЗ” на прыпынку грамадскага транспарту паблізу дома № 174 па вул. Даўгінаўскі тракт “здзейсніў наезд на маршрутны транспартны сродак, які стаяў”.
19 студзеня пра ДТЗ з маршруткай паведамляла Міністэрства ўнутраных спраў. Сем чалавек, у тым ліку 11-гадовае дзіця, былі дастаўленыя ў бальніцу. Аварыя адбылася каля 10 гадзін на аўтадарозе, якая злучае Мінск і Мачулішчы.
29 снежня 2024 года ў выніку сутыкнення легкавога аўтамабіля БМВ і маршрутнага таксі ў Жыткавіцкім раёне (Гомельская вобласць) 11 чалавек, якія ехалі ў мікрааўтобусе, даставілі ў бальніцу для абследавання. Сярод іх было 8-гадовае дзіця.
16 снежня ў Валожынскім раёне (Мінская вобласць) здарылася аварыя з удзелам маршруткі, у якой было дзевяць пасажыраў. Паводле інфармацыі МУС, 66-гадовы кіроўца, які прыцягваўся да адказнасці больш як 40 разоў, не справіўся з кіраваннем і з’ехаў у кювет. Аўтамабіль перакуліўся.
