Рэпрэсіі ў Беларусі непрымальныя і павінны быць спыненыя — Калас і Кос

9 жніўня, Позірк. Неадкладна вызваліць усіх палітвязняў, спыніць рэпрэсіі і пачаць інклюзіўны нацыянальны дыялог заклікалі беларускія ўлады кіраўнік еўрапейскай дыпламатыі Кая Калас і еўракамісар па пашырэнні Марта Кос з нагоды пятай гадавіны прэзідэнцкіх выбараў-2020.

“Працягваецца падаўленне грамадзянскай супольнасці павінна спыніцца. Беларусь таксама павінна спыніць падтрымку незаконнай вайны Расіі супраць Украіны”, — падкрэслілі яны.

Калас і Кос заявілі пра салідарнасць з беларускім народам і паведамілі, што з 2020 года ЕС выдаткаваў 170 млн еўра на падтрымку беларускай грамадзянскай супольнасці, незалежных СМІ і ахвяр рэпрэсій.

ЕС працягне падтрымліваць беларускі народ на яго шляху да дэмакратыі столькі, колькі спатрэбіцца, і ўводзіць санкцыі супраць тых, хто душыць дэмакратыю і парушае правы чалавека, падкрэслілі прадстаўніцы ЕС.

Паводле справаздачы Еўракамісіі, як толькі Беларусь пачне дэмакратычныя пераўтварэнні, ЕС актывуе інвестыцыйны пакет у памеры 3 млрд еўра, каб дапамагчы стабілізаваць эканоміку і правесці рэформу дзяржаўных інстытутаў. Адзначаецца, што больш за 3 тыс. ахвяр рэпрэсій атрымалі юрыдычную, фінансавую, медыцынскую, псіхалагічную дапамогу, а таксама дапамогу ў пераездзе.

Міжнародная платформа падсправаздачнасці для Беларусі (IAPB) атрымала падтрымку для збору доказаў парушэнняў правоў чалавека, учыненых беларускімі ўладамі.

Больш за 130 дзеячаў культуры атрымалі падтрымку для мабільнасці, каб наладзіць новыя партнёрскія стасункі, браць удзел у міжнародных культурных мерапрыемствах, павысіць кваліфікацыю. Выдзелена больш за 110 грантаў на культурныя праекты.

Адзначаецца, што незалежныя СМІ атрымалі падтрымку для распаўсюду аб’ектыўнай, заснаванай на фактах інфармацыі грамадзянам у гарадах і сельскіх раёнах па ўсёй краіне.

Сотні грамадзянскіх актывістаў атрымалі падтрымку для працягу сваёй працы. Больш 3.300 студэнтаў атрымалі стыпендыі і дапамогу ў аплаце навучання за мяжой.

Больш за 700 спецыялістаў атрымалі падтрымку ў пераездзе. Больш за 3 тыс. жанчын прайшлі Анлайн-курсы па асновах інфармацыйных тэхналогій і навыках міжасобасных зносін. Больш за 500 кансультацыйных паслуг прадастаўлена малым і сярэднім прадпрыемствам у выгнанні.

Звыш 4 тыс. прадпрыемстваў у выгнанні ўзялі ўдзел у праграмах бізнес-адукацыі.