У неўладкаванай віцебскай сям’і памерла пяцімесячнае дзіця

4 верасня, Позірк. Аб выяўленні ў ліпені ў Віцебску цела пяцімесячнага дзіцяці паведамляе Генеральная пракуратура.

Цела было знойдзена ў кватэры, дзе пражывае неўладкаваная сям’я, вынікае з рэлізу нагляднага ведамства.

У дачыненні да бацькі загінулага дзіцяці ўзбуджаная крымінальная справа паводле ч. 1 арт. 144 КК (прычыненне смерці па неасцярожнасці).

Паведамляецца, што ў сям’і выхоўвалася трое дзяцей. Пры гэтым у кастрычніку 2024 года “двое непаўналетніх з дадзенай сям’і прызнаныя дзецьмі, якія знаходзяцца ў сацыяльна небяспечным становішчы”.

Устаноўлена, што “бацькі ўжывалі алкагольныя напоі, у бацькі на працягу доўгага перыяду часу адсутнічала праца”.

Генпракуратура заяўляе, што “органамі апекі і папячыцельства, камісіяй па справах непаўналетніх адной з адміністрацый Віцебска, нягледзячы на наяўнасць фактараў, якія пагражаюць дабрабыту, здароўю і жыццю непаўналетніх у сям’і, неабходныя меры па абароне іх правоў і законных інтарэсаў былі прынятыя не ў поўным аб’ёме”.

“Суб’екты прафілактыкі несвоечасова прыступілі да выканання мерапрыемстваў па ліквідацыі прычын і ўмоў, якія садзейнічалі стварэнню неўладкаванага становішча ў сям’і”, іх рашэнні прымаліся “без належнага аналізу сітуацыі ў сям’і, у адсутнасць інфармацыі ўсіх зацікаўленых у выкананні рашэння службаў”, падкрэсліваецца ў паведамленні ведамства.

Адзначаецца, што да адказнасці прыцягнута 15 службовых асоб.

У 2024 годзе ад знешніх прычын у краіне загінула 126 дзяцей — на 34% больш, чым у 2023-м (94), паведаміў у сакавіку намеснік начальніка галоўнага ўпраўлення — начальнік упраўлення па наглядзе ў сацыяльнай сферы Генеральнай пракуратуры Павел Зайцаў.

Асноўнымі прычынамі гібелі былі суіцыд, дарожна-транспартныя здарэнні, утапленні і пажары. Лічбы па кожнай катэгорыі спікер не прывёў.