Сілавікі затрымалі намесніка дырэктара “аднаго з прадпрыемстваў хімгаліны” Гродна
5 верасня, Позірк. Пры атрыманні хабару затрыманы намеснік дырэктара “аднаго з прадпрыемстваў хімічнай галіны” Гродна, паведаміў 5 верасня начальнік 9-га ўпраўлення Галоўнага ўпраўлення па барацьбе з арганізаванай злачыннасцю і карупцыяй Міністэрства ўнутраных спраў Андрэй Ярошык.
Паводле слоў прадстаўніка ГУБАЗіК, відэакаментарый якога апублікавала прэс-служба МУС, пры затрыманні выкарыстоўвалася “сілавая падтрымка” спецпадраздзялення па барацьбе з тэрарызмам “Алмаз”.
Падазраваны, як сцвярджае Ярошык, “прыняў ад кіраўніка камерцыйнай структуры “падзякі” на агульную суму не менш як 75 тыс. рублёў”. Грошы перадаваліся “за арганізацыю адгрузкі вырабленай заводам прадукцыі”.
Як адзначаецца, з мэтай “утойвання сваёй злачыннай дзейнасці” фігурант “карыстаўся некалькімі тэлефонамі”, а таксама “прызначаў сустрэчы ў розных рэгіёнах краіны”.
Следчы камітэт распачаў крымінальную справу паводле ч. 3 арт. 430 КК (атрыманне хабару), які прадугледжвае пакаранне ў выглядзе пазбаўлення волі на тэрмін да 15 гадоў.
Назву прадпрыемства і прозвішча затрыманага прадстаўнік ГУБАЗіК не ўдакладніў.
26 жніўня прэс-служба МУС паведамляла пра затрыманне з доказамі злачынства “службовай асобы буйнога дзяржаўнага прадпрыемства, якое забяспечвае вытворчыя патрэбы вядучых аўтамабільных вытворцаў” Беларусі і блізкага замежжа.
Паводле даных Вярхоўнага суда, якія раней прыводзіў “Позірк”, у студзені — чэрвені 2025 года за здзяйсненне карупцыйных злачынстваў асуджана 304 чалавекі — на 7,3% менш, чым за той жа перыяд 2024-га (328).
З іх 84 прыгавораны да розных тэрмінаў пазбаўлення волі.
Больш за ўсё асуджана за здзяйсненне наступных злачынстваў: крадзеж шляхам злоўжывання службовымі паўнамоцтвамі (арт. 210 КК) — 133, атрыманне хабару (арт. 430) — 93, перавышэнне ўлады або службовых паўнамоцтваў (ч. 2, 3 арт. 426) — 45. Таксама фігурантаў карупцыйных спраў прызнавалі вінаватымі ў злоўжыванні ўладай або службовымі паўнамоцтвамі.
За дачу хабару асуджана 12 чалавек, за пасярэдніцтва ў хабарніцтве — адзін.
