МЗС Польшчы пра закрыццё мяжы з Беларуссю: Спачатку — бяспека, затым — выдаткі
15 верасня, Позірк. Урад Польшчы ў сваёй дзейнасці кіруецца меркаваннямі дзяржаўнай бяспекі, а не гандлёвымі выгадамі, заявіў прэс-сакратар Міністэрства замежных спраў гэтай краіны Павел Вроньскі.
Як паведамляе агенцтва РАР, з заявай Вроньскі выступіў 15 верасня на брыфінгу па выніках перамоваў міністраў замежных спраў Польшчы і Кітая Радаслава Сікорскага і Ван І. Такім чынам прэс-сакратар МЗС адказаў на пытанне аб выдатках, якія панясуць Польшча і Кітай у сувязі з закрыццём Варшавай мяжы з Беларуссю.
“У нас няма ніякіх аналізаў, [якія б паказвалі], у колькі абыдзецца закрыццё мяжы. Логіка бяспекі падказвае, што спачатку — бяспека, а потым ужо ўлічваюцца выдаткі”, — сказаў прадстаўнік ведамства.
На пытанне, ці праінфармаваў польскі ўрад еўрапейскіх партнёраў пра намер закрыць мяжу, ён адказаў адмоўна, бо гэта — “суверэннае рашэнне Польшчы”.
Вроньскі таксама адзначыў, што падчас перамоваў Сікорскага і Ван І закраналася тэма адносін Польшчы з Беларуссю і закрыцця памежных пераходаў. “Польшча паказала Кітаю, што для нас гэта нявыгадная сітуацыя. Мы прымаем рашэнне, якое дорага абыходзіцца і Польшчы, але наша краіна вымушана прыняць гэтае рашэнне з-за неаднаразовых правакацый з беларускага боку”, — падкрэсліў прадстаўнік МЗС.
Паводле яго слоў, польскі бок “папярэдзіў кітайскіх партнёраў аб дэструктыўных дзеяннях Расіі”. “Мы спадзяемся, што гэтыя дзеянні Масквы і Мінска сустрэнуць супрацьдзеянне з боку Кітая”, — заявіў прадстаўнік МЗС.
Перамовы кіраўнікоў палітычных ведамстваў Польшчы і Кітая прайшлі ў прыгарадзе Варшавы 15 верасня, пры гэтым заявы міністраў, якія планаваліся пасля сустрэчы, былі адмененыя на просьбу кітайскага боку.
Пасля заканчэння перамоў кіраўнік МЗС КНР адправіўся на сустрэчу з прэзідэнтам Польшчы Каралем Наўроцкім.
10 верасня міністр замежных спраў Беларусі Максім Рыжанкоў, каментуючы рашэнне аб закрыцці Польшчай з 12 верасня мяжы з Беларуссю ў сувязі з вучэннямі “Захад-2025”, заявіў, у прыватнасці, што “практычна тры чвэрці грузаў”, якія ідуць на захад праз мяжу Беларусі і Польшчы, маюць “кітайскае паходжанне”. “Вось вам адказ, супраць каго накіравана ў тым ліку гэтае рашэнне”, — сказаў ён.
Польшча закрыла ўсе кантрольна-прапускныя пункты на мяжы з Беларуссю, уключаючы адзіны дзейны для пропуску легкавых аўтамабіляў КПП Цярэспаль (Брэст) з 0 гадзін па польскім часе (1 гадзіна па мінскім часе) 12 верасня як мінімум на перыяд манеўраў.
Мяжа Беларусі з Польшчай выкарыстоўваецца Кітаем для транзіту сваіх тавараў у краіны Еўрасаюза. 24 чэрвеня 2024 года тагачасны прэзідэнт Польшчы Анджэй Дуда абмеркаваў у Пекіне з лідарам КНР Сі Цзіньпінам крызіс на беларуска-польскай мяжы. Паводле слоў Дуды, “гібрыдная атака” (так ён назваў спробы масавага пранікнення нелегалаў з трэціх краін з тэрыторыі Беларусі, якія працягваюцца з вясны 2021 года) на мяжы стала перашкодай для рэалізацыі кітайскай ініцыятывы “Пояс і шлях”.
