Ціханоўская сустрэлася з Зяленскім на саміце Еўрапейскай палітычнай супольнасці
2 кастрычніка, Позірк. Беларускі дэмакратычны лідар Святлана Ціханоўская правяла кароткую сустрэчу з прэзідэнтам Украіны Уладзімірам Зяленскім на палях саміту Еўрапейскай палітычнай супольнасці, які адкрыўся 2 кастрычніка ў Капенгагене. Пра гэта паведамляецца ў тэлеграм-канале Ціханоўскай.
“Я рада бачыць прэзідэнта Зяленскага. Мы падтрымліваем Украіну і яе барацьбу за свабоду і незалежнасць. Бо лёс Беларусі таксама залежыць ад Украіны. Дзякуй прэзідэнту Зяленскаму за мужнасць і згоду працягнуць зносіны”, — напісала палітык па выніках сустрэчы.
На палях саміту яна таксама сустрэлася з прэм’ер-міністрам Польшчы Дональдам Тускам.
Пра тое, што Ціханоўская ўдзельнічае ў VII саміце Еўрапейскай палітычнай супольнасці ў Капенгагене, раней паведаміў “Позірку” галоўны дарадца дэмакратычнага лідара Франак Вячорка.
У сталіцу Даніі прыбыло каля 50 кіраўнікоў дзяржаў і ўрадаў, прадстаўнікі міжнародных арганізацый. Паводле слоў Вячоркі, Ціханоўская ўдзельнічае ў саміце па запрашэнні прэм’ер-міністра Даніі Метэ Фрэдэрыксен і прэзідэнта Еўрапейскага савета Антоніу Кошты.
Асноўныя тэмы мерапрыемства — Украіна, бяспека і міграцыя.
Віншуючы 24 жніўня ўкраінцаў і Уладзіміра Зяленскага з Днём незалежнасці, Ціханоўская адзначыла, што стойкасць і адвага жыхароў Украіны ў адбіцці расійскай агрэсіі сталі “светлым прыкладам для ўсяго свету”, але “асабліва — для беларусаў”.
“Ужо чацвёрты год украінскі народ сустракае Дзень незалежнасці ў жорсткіх умовах поўнамаштабнай вайны. Вам даводзіцца плаціць найвышэйшую цану за сваю незалежнасць. Але вы абараняеце не толькі сваю зямлю — вы абараняеце права ўсіх людзей жыць у свабодзе”, — заявіла палітык.
