Рассельгаснагляд не ўпусціў з Беларусі полацкае масла і італьянскія кармы для жывёл

3 чэрвеня, Позірк. Аб затрыманні 2 чэрвеня на мяжы з Беларуссю аўтамабіляў, якія перавозілі масла і італьянскія кармы для жывёл, паведаміла 3 чэрвеня Федэральная служба Расіі па ветэрынарным і фітасанітарным наглядзе (Рассельгаснагляд).

У першым выпадку супрацоўнікамі ведамства затрыманы аўтамабіль, які перавозіў з Беларусі ў РФ каля 2 тон масла.

Паведамляецца, што “ў адпаведнасці з маркіроўкай, якая была на ўпакоўцы, прадукцыя была вырабленая ААТ “Полацкі малочны камбінат” (Віцебская вобласць). Аднак, як адзначаецца, “таварна-суправаджальныя і ветэрынарныя дакументы на яе адсутнічаюць“, перавозчык “не змог назваць інспектарам ведамства ні адпраўніка, ні атрымальніка масла“.

“Пры аглядзе транспартнага сродку ўстаноўлена, што груз перавозіўся з грубымі парушэннямі ўстаноўленых санітарных нормаў“, — паведамляе Рассельгаснагляд.

Адзначаецца, што цяпер “працягваецца расследаванне прычын і абставінаў, якія садзейнічалі парушэнню правілаў перамяшчэння прадукцыі, якая падлягае дзяржаўнаму ветэрынарнаму кантролю“. Узоры масла накіраваныя для лабараторнага даследавання, па выніках якога будзе прынятае рашэнне аб далейшым лёсе грузу.

У другім выпадку паведамляецца аб затрыманні “беларускіх аўтамашын, якія перавозілі з Беларусі Расію каля 6 тон фасаваных кармоў для непрадуктыўных жывёл італьянскай вытворчасці“.

Транспартныя сродкі рухаліся па маршруце, “абыходзячы афіцыйныя пункты ўвозу імпартных грузаў”, гаворыцца ў рэлізе.

“Пры ажыццяўленні кантролю было ўстаноўлена, што ветэрынарныя і таварна-суправаджальныя дакументы на кармы адсутнічаюць. Кіроўцы не змаглі даць інспектарам нагляднага ведамства інфармацыю аб адпраўніку і атрымальніку гэтай прадукцыі“, — адзначае ведамства.

Перавозчык прыцягнуты да адміністрацыйнай адказнасці.

Як і ў выпадку з маслам, канчатковае рашэнне ў дачыненні да прадукцыі будзе прынятае пасля лабараторнай экспертызы.