Праверка боегатоўнасці арміі праходзіць з выкарыстаннем досведу “спецыяльнай ваеннай аперацыі” — Вальфовіч

12 кастрычніка, Позірк. Пра “асаблівасці праверкі баявой гатоўнасці” Узброеных сіл паведаміў дзяржсакратар Савета бяспекі Аляксандр Вальфовіч.

Паводле яго слоў, якія перадае прэс-служба Міністэрства абароны, па даручэнні Аляксандра Лукашэнкі “раптоўная праверка” боегатоўнасці праходзіць “з 6 кастрычніка”.

“У ходзе першага этапу былі адпрацаваныя пытанні прывядзення ў баявую гатоўнасць у штатах мірнага часу, укамплектавання, папаўнення бягучага некамплекту, павышэння запасаў матэрыяльных сродкаў і выхаду ў раёны засяроджвання. У раёнах засяроджвання былі адпрацаваныя пытанні інжынернага абсталявання ў аб’ёмах задач першай чаргі на працягу трох сутак”, — сказаў чыноўнік.

“У першую чаргу, — дадаў ён, — мы ацэньвалі, ці ўлічваецца досвед “спецыяльнай ваеннай аперацыі” пры выкананні інжынерных работ. Мы бачылі, што гэты досвед улічваецца. Гэта значыць раён засяроджвання цалкам быў заглыблены: абсталяваныя бліндажы, перакрытыя шчыліны, камандныя назіральныя пункты цалкам заглыбленыя”.

Вальфовіч паведаміў, што на першым этапе праверкі “адпрацоўваліся пытанні тактычнай маскіроўкі, усебаковага забеспячэння”: “Асабліва мы звярталі ўвагу на пытанні вартавога ахоўвання — аховы раёна засяроджвання як ад паветранага праціўніка, беспілотных лятальных сродкаў, так і ад уздзеяння дыверсійна-разведвальных груп праціўніка”.

Гаворачы аб другім этапе, дзяржсакратар Савета бяспекі адзначыў, што задзейнічанаму ў праверцы танкаваму батальёну “ўручаныя распараджэнні на здзяйсненне маршу”, марш танкі здзяйсняюць “сваім ходам”. “Працягласць маршу прыкладна ў памерах сутачнага пераходу: даволі працяглы маршрут з аднаго палігона на іншы”, — удакладніў чыноўнік.

“Таксама ў ходзе здзяйснення маршу мы глядзім, як улічваецца досвед “спецыяльнай ваеннай аперацыі” — пытанні ахоўвання і прыкрыцця з паветра. Здзяйсненне маршу праходзіць у складаных умовах, па наведзеным пераправам праз водныя перашкоды. Наша рэспубліка мае шмат розных рачных загарод, перашкод. Таму гэтыя пытанні неабходна ўгледжваць і адпрацоўваць”, — сказаў Вальфовіч.

Падчас мерапрыемстваў, паводле яго слоў, “раптоўна правераныя і інжынерныя падраздзяленні Паўночна-заходняга аператыўнага камандавання, як яны ўмеюць наводзіць пераправы ў самы кароткі час”. Паводле сцвярджэння дзяржсакратара Савета бяспекі, “з задачай яны справіліся”.

“Звернута ўвага, як прыкрываюцца пераправы ад уздзеяння з паветра, ці выкарыстоўваюцца сучасныя формы і спосабы вядзення баявых дзеянняў пры адпрацоўцы гэтых навучальных пытанняў. Папярэдне можна сказаць, што ў цэлым асабісты склад паказвае высокія прафесійныя навыкі”, — падкрэсліў чыноўнік.

“Гэта заканамерна, — заявіў ён. — Навучальны год ва Узброеных сілах падыходзіць да завяршэння, гэта значыць поўны этап падрыхтоўкі пройдзены. І цяпер мы правяраем, ці ўсяму мы навучылі сваіх вайскоўцаў”.

Каб “мірныя грамадзяне” Беларусі “маглі спакойна выконваць задачы”, вайскоўцы “павінны прафесійна і пісьменна быць здольнымі ў любы момант абараніць сваю краіну і нацыянальныя інтарэсы”, сказаў Вальфовіч.

“Таму ў ходзе праверкі мы ацэнім прафесіяналізм і ўменні нашых вайскоўцаў выконваць свае задачы па прызначэнні. Вядома, праверка яшчэ ў самым разгары. Пасля здзяйснення маршу трэба будзе яшчэ даць справаздачу па кантрольных занятках па прадметах баявой падрыхтоўкі — агнявой падрыхтоўкі, інжынернай падрыхтоўкі, тактычнай”, — адзначыў дзяржсакратар Савета бяспекі.

Упор на другім этапе, паводле яго слоў, будзе зроблены на “праверку фізічнай падрыхтоўкі, фізічнай вынослівасці вайскоўцаў — гэта адзін з галоўных паказчыкаў здольнасці выконваць задачы”.

Аб выніках праверкі будзе праінфармаваны Лукашэнка, паведаміў Вальфовіч.

11 кастрычніка Мінабароны паведаміла, што ў Беларусі “з мэтай праверкі” праводзіцца “комплекс мерапрыемстваў” па прывядзенні Узброеных сіл у “вышэйшыя ступені” баявой гатоўнасці.

Аб другім этапе праверкі боегатоўнасці арміі ведамства паведаміла 12 кастрычніка.

Тэрмінам “СВА” (“спецыяльная вайсковая аперацыя”) расійскія, а ўслед за імі і беларускія ўлады і прапагандысты называюць поўнамаштабную агрэсію РФ супраць Украіны.