Ругінене: Стасункі з Мінскам напружаныя, таму Вільнюс прымае жорсткія меры для ўтаймавання сітуацыі

20 лістапада, Позірк. Палітыка Мінска ў дачыненні да Літвы не носіць добразычлівы характар, заявіла прэм’ер-міністр балтыйскай краіны Інга Ругінене.

“Я ўжо не раз казала, што літоўскі бок ніколі не затрымліваў фуры, — прыводзіць яе словы Delfi. — Прымаючы рашэнне аб закрыцці межаў, мы стварылі ўмовы для вяртання цягачоў. Беларусы ж закрылі сваю мяжу і не выпусцілі фуры, ужылі дадатковыя меры. Гэта былі выключна іх дзеянні”.

Паводзіны беларускага боку, які яшчэ не вырашыў праблему вяртання літоўскіх фур на сумежную тэрыторыю, яна назвала адказам на пытанне, чаму Літва закрывала мяжу і здзяйсняла ціск.

“Усім скептыкам, якія кажуць, што метэазонды — гэта міф, што гібрыднай атакі не было, цяпер дадзены адказ“, — падкрэсліла прэм’ер-міністр.

Паводле яе слоў, стасункі з Беларуссю ў цяперашні час напружаныя, таму літоўскія ўлады “прымаюць жорсткія меры для ўтаймавання сітуацыі і дэманстрацыі адказу, які пасуе“.

Пункты пропуску Мядзінінкай і Шальчынінкай на літоўска-беларускай мяжы аднавілі працу апоўначы 20 лістапада (а 1:00 паводле мінскага часу). Вільнюс закрыў памежныя пераходы ў канцы кастрычніка, дамагаючыся такім чынам рэакцыі Мінска на масавыя прылёты з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.

Нягледзячы на рашэнне ўрада аб адкрыцці двух КПП на мяжы з Беларуссю, прэзідэнт асацыяцыі літоўскіх перавозчыкаў Linava Эрландас Мікенас сказаў, што фуры яшчэ не могуць вярнуцца ў Літву. Паводле яго, гэтаму перашкаджае беларускі бок.

Міністэрства замежных спраў Беларусі прапануе правесці кансультацыі паміж Беларускім і літоўскім знешнепалітычнымі ведамствамі — для выпрацоўкі “ўстойлівага механізму працы пунктаў пропуску і прадухілення іх закрыцця ў будучыні“, заявіў 20 лістапада прэс-сакратар МЗС Руслан Варанкоў.

“Беларусі і Літве патрэбная мяжа, якая аб’ядноўвае, а не падзяляе. Цяпер усё залежыць ад рашэнняў Вільнюса”, — сказаў спікер МЗС.