У Латвіі знайшлі метэазонды з кантрабанднымі цыгарэтамі з Беларусі
24 лістапада, Позірк. Метэазонды з кантрабанднымі цыгарэтамі, якія заляцелі з Беларусі, былі знойдзеныя напярэдадні ў Латвіі, паведаміў у эфіры TV3 міністр унутраных спраў гэтай балтыйскай дзяржавы Рыхардс Казлоўскіс.
Паводле яго слоў, якія перадае партал навін Delfi, з вечара 23 лістапада атрымалася перахапіць сем шароў, кожны з якіх транспартаваў каля 60 тыс. кантрабандных цыгарэт (па 3 тыс. пачкаў).
“Праца працягваецца, аб’ёмы ўдакладняюцца, але феномен такі існуе”, — канстатаваў Казлоўскіс, адзначыўшы, што ў Латвіі — у адрозненне ад Літвы — гэтая сітуацыя “не стварае сур’ёзных пагроз крытычнай інфраструктуры”, бо “побач з мяжой няма аэрапорта”. Разам з тым, падкрэсліў ён, груз, што падае, “праз сваю вагу можа нанесці лакальныя пашкоджанні”.
Міністр заклікаў жыхароў пры выглядзе аэрастатаў не чакаць іх прызямлення і не спрабаваць іх збіць, а паведамляць кампетэнтным органам.
Паводле слоў кіраўніка МУС, латвійскія службы ўнутраных спраў супрацоўнічаюць з калегамі з Літвы і Польшчы. Ужо адбылося “некалькі сустрэч па абмене досведам пра тое, як супрацьдзейнічаць гэтаму феномену”.
Напрыканцы кастрычніка Вільнюс закрыў пункты пропуску, дамагаючыся такім чынам рэакцыі Мінска на масавыя прылёты з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.
У адказ рэжым Аляксандра Лукашэнкі забараніў зарэгістраванаму ў Літве грузавому транспарту перасякаць мяжу дзе б там ні было, за выключэннем пунктаў пропуску на беларуска-літоўскім участку. Урад юрыдычна ўвязаў легальнасць перамяшчэння гэтага транспарту па тэрыторыі краіны з працай пагранпераходаў. У Беларусі захрасла каля 1,3 тыс. літоўскіх грузавікоў.
Пункты Мядзінінкай і Шальчынінкай аднавілі працу апоўначы 20 лістапада (у 1:00 паводле мінскага часу), аднак літоўскі грузавы транспарт так і не пачаў вяртацца.
21 лістапада МЗС Літвы ўручыла прадстаўніку беларускай амбасады ноту пратэсту ў сувязі з “дыскрымінацыйнымі дзеяннямі ў дачыненні да літоўскіх перавозчыкаў”.
Афіцыйны Вільнюс расцэньвае “наўмысны нявыпуск” з тэрыторыі Беларусі цягачоў, прычэпаў і паўпрычэпаў, якія належаць літоўскім кампаніям і грамадзянам, як “наўмыснае адабранне маёмасці і грубае парушэнне агульнапрызнаных нормаў міжнароднага права”.
Літоўскае МЗС “настойліва запатрабавала” ад уладаў у Мінску “неадкладна спыніць названыя дыскрымінацыйныя дзеянні і папярэдзіла, што ў адваротным выпадку Літва пакідае за сабой права звярнуцца ў суд з адпаведным іскам, запатрабаваць кампенсацыі нанесенай шкоды і зрабіць іншыя захады ў адказ як на нацыянальным узроўні, так і на ўзроўні Еўрасаюза”.
Пасля прыпынення працы пунктаў пропуску МЗС Беларусі неаднаразова крытыкаваў Літву за гэтае рашэнне. У дзень адкрыцця мяжы прэс-сакратар Руслан Варанкоў заявіў, што міністэрства прапануе правесці кансультацыі паміж беларускім і літоўскім знешнепалітычнымі ведамствамі — для выпрацоўкі “ўстойлівага механізму працы пунктаў пропуску і прадухілення іх закрыцця ў будучыні”.
