У Літве распачата расследаванне па факце аказання дапамогі іншай дзяржаве — з-за шароў з Беларусі

2 снежня, Позірк. Генеральная пракуратура Літвы пачала расследаванне па факце аказання дапамогі іншай дзяржаве ў дзеяннях, накіраваных супраць краіны, паведамляе інфармацыйнае агенцтва BNS.

Гаворка ідзе аб кантрабандзе цыгарэт з Беларусі з дапамогай паветраных шароў.

Як паведамілі ў пракуратуры, рашэнне прынята “пасля ацэнкі сістэматычна зафіксаваных апошнім часам на тэрыторыі Літвы навігацыйных знакаў і паветраных шароў з кантрабанднымі грузамі, а таксама пагроз нацыянальнай бяспекі, што ўзнікаюць у сувязі з гэтым”.

Адзначаецца, што з-за шароў паветраная прастора над аэрапортамі Вільнюса і Каўнаса з кастрычніка гэтага года абмяжоўвалася больш за дзесяць разоў.

Упраўленне па расследаванні арганізаванай злачыннасці і карупцыі Генеральнай пракуратуры ўпаўнаважанае кіраваць і арганізоўваць правядзенне папярэдняга расследавання.

Па паведамленні BNS, кіраўнік кампаніі Oro Navigacija Саўлюс Батавічус заявіў, што кантрабандныя паветраныя шары наўмысна запускаюцца ў раёны, небяспечныя для авіяцыі.

Паводле яго, за 11 гадзін, калі Вільнюскі аэрапорт быў зачынены з 30 лістапада па 1 снежня, было заўважана 60 паветраных шароў, 40 з якіх знаходзіліся ў “крытычных месцах”.

Міністр транспарту і камунікацый Літвы Юрас Тамінскас на мінулым тыдні звярнуўся ў Генеральную пракуратуру з просьбай пачаць дасудовае расследаванне па факце кантрабанды паветраных шароў з тэрыторыі Беларусі.

Урад Літвы пакуль не разглядае магчымасць закрыць мяжу ў якасці меры ў адказ.

Разам з тым такое рашэнне можа быць прынятае ў будучыні, паведамілі 1 снежня літоўскія СМІ са спасылкай на намесніка міністра ўнутраных спраў Вайдотаса Якштаса.

Як раней паведамляў “Позірк”, 30 лістапада стала вядома аб чарговых “часовых абмежаваннях паветранай прасторы” над аэрапортам Вільнюса.

Пасля аднаўлення працы памежных пераходаў Літва ўжо пяць разоў прыпыняла працу аэрапорта ў Вільнюсе з-за новых метэазондаў, якія ўрываліся ў паветраную прастору краіны з тэрыторыі Беларусі.

У канцы кастрычніка Літва закрыла пункты пропуску Мядзінінкай (з беларускага боку — Каменны Лог) і Шальчынінкай (Беняконі), дамагаючыся такім чынам рэакцыі Мінска на масавы прылёт з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.

Пагранпераходы аднавілі працу 20 лістапада. За тры тыдні, пакуль яны былі зачыненыя, рэжым Лукашэнкі паспеў узмацніць жорсткасць правілаў знаходжання ў краіне літоўскага грузавога транспарту, увязаўшы іх з працай пунктаў пропуску. У Беларусі затрымалася каля 1,3 тыс. зарэгістраваных у Літве грузавікоў, якія не могуць выехаць з краіны нават пры адкрытай граніцы.

Пры гэтым Мінск настойвае, што далейшыя перамовы з Вільнюсам па гэтым пытанні павінны весціся на палітычным узроўні, Літва (прынамсі публічна) спрабуе пазбегнуць гэтага. Такія кантакты, на думку ўладаў балтыйскай дзяржавы, будуць азначаць легітымацыю беларускага рэжыму.