У двух аўтобусах з Беларусі польскія мытнікі знайшлі кантрабандныя цыгарэты

14 студзеня, Позірк. Аб затрыманні двух партый кантрабандных беларускіх цыгарэт паведаміла Мытна-падатковая служба Польшчы.

Адзначаецца, што нелегальны тавар перавозілі кіроўцы двух аўтобусаў, якія “старанна дагледзелі пры ўездзе ў краіну”. Цыгарэты былі знойдзеныя ў “запасных шынах і ў агульнадаступных месцах аўтобуса”.

Кіроўцы прызналіся ў супрацьпраўных дзеяннях — кожны спрабаваў незаконна ўвезці ў Польшчу 500 пачкаў цыгарэт з беларускімі акцызнымі маркамі. Агульны ацэначны рынкавы кошт цыгарэт складае каля 17,6 тыс. злотых (каля 4,9 тыс. долараў), паведамляе служба.

Віноўнікам прызначаны штраф на агульную суму 24,9 тыс. злотых (каля 6,9 тыс. долараў).

9 студзеня паведамлялася, што ў Польшчы выяўленыя чатыры партыі кантрабандных цыгарэт, дастаўленых з Беларусі па паветры. Два пакеты з тытунёвымі вырабамі было перапраўлена праз мяжу з дапамогай беспілотнікаў, яшчэ два — з дапамогай метэаралагічных шароў. Кошт канфіскаваных цыгарэт перавысіў 11 тыс. злотых (больш за 3 тыс. долараў).

За 2025 год польскія памежнікі зафіксавалі не менш за 185 выпадкаў кантрабанды цыгарэт аэрастатамі.