14 студзеня, Позірк. Аб выяўленні “незвычайнага пасажыра” ў адным з аўтамабіляў, якія прыбылі з ЗША, паведаміў 14 студзеня Дзяржаўны мытны камітэт (ДМК).
Гаворка аб яноце, знойдзеным супрацоўнікамі гродзенскай мытні і прадпрыемства “Белмытнясэрвіс” у аўтамабілі, які перамяшчаўся ў марскім кантэйнеры.
Мяркуецца, што жывёла “забралася ў кантэйнер яшчэ на этапе пагрузкі і паспяхова пераадолела доўгі шлях праз акіян”.
Паведамляецца, што ў ведамасны пункт мытнага афармлення “Каменны Лог-ТЛЦ” (мяжа з Літвой) былі “аператыўна выкліканыя профільныя спецыялісты, да прыбыцця якіх мытнікі і работнікі прадпрыемства забяспечвалі яноту неабходныя ўмовы чакання”.
Жывёла накіраваная на каранцін у Ашмянскую раённую ветэрынарную станцыю (Гродзенская вобласць), дзе будзе знаходзіцца пад наглядам спецыялістаў.
Адзначаецца, што па завяршэнні каранцінных мерапрыемстваў янота перададуць Налібоцкую пушчу (размешчаная на тэрыторыі Гродзенскай і Мінскай абласцей. — “Позірк”.) альбо ў Гродзенскі заапарк.
Рашэнне будзе прынятае “з улікам стану жывёлы і ветэрынарных заключэнняў”, гаворыцца ў паведамленні.
