Янот, знойдзены ў аўтамабілі, што прыбыў з ЗША, застанецца на каранціне мінімум да 17 студзеня

16 студзеня, Позірк. Янот, знойдзены ў аўтамабілі, што прыбыў з ЗША, з вечара 14 студзеня знаходзіцца пад назіраннем спецыялістаў Ашмянскай раённай ветэрынарнай станцыі (Гродзенская вобласць), паведамляе прэс-служба Дзяржаўнага мытнага камітэта.

“Пасля 72 гадзін каранціну будуць праведзеныя патрабаваныя ветэрынарныя мерапрыемствы і вырашанае пытанне пра далейшае “месца жыхарства” жывёлы, — гаворыцца ў паведамленні. — Ужо зразумела, што незвычайнаму “пасажыру” аўто, які паступіў для афармлення ў Гродзенскую рэгіянальную мытню, з ежы найбольш упадабаў курыныя яйкі. Да людзей Сеня (так назвалі жывёлу. — “Позірк”.) ставіцца прыязна”.

Як паведамляў “Позірк”, 14 студзеня супрацоўнікі гродзенскай мытні і прадпрыемства “Белмытсэрвіс” выявілі янота ў аўтамабілі, які перамяшчаўся ў марскім кантэйнеры. Мытнікі выказалі здагадку, што жывёла “забралася ў кантэйнер яшчэ на этапе пагрузкі і паспяхова пераадолела працяглы шлях праз акіян”.

Паведамлялася, што пасля завяршэння каранцінных мерапрыемстваў янота перададуць Налібоцкую пушчу (размешчаная на тэрыторыі Гродзенскай і Мінскай абласцей) або ў Гродзенскі заапарк.

Рашэнне будзе прынятае “з улікам стану жывёльнага і ветэрынарных заключэнняў”.