Іспанія выпусціла інструкцыю аб прызнанні пратэрмінаваных беларускіх пашпартоў
21 студзеня, Позірк. Інструкцыю аб прызнанні пратэрмінаваных беларускіх пашпартоў выпусціла 19 студзеня Галоўнае дзяржаўнае ўпраўленне Іспаніі. Скан дакумента распаўсюдзіў Офіс Святланы Ціханоўскай.
“Пасля выдання 4 верасня 2023 года беларускімі ўладамі ўказа (“Аб парадку выдачы дакументаў і здзяйснення дзеянняў”. — “Позірк”.) беларускім амбасадам і консульствам за мяжой забаронена выдаваць пашпарты. Гэтая мера накіравана на тое, каб прымусіць беларускіх грамадзян за мяжой — каля шасці тысяч у выпадку Іспаніі — вярнуцца для атрымання або падаўжэння пашпартоў у Беларусь, дзе некаторыя з іх знаходзяцца пад рэальнай рызыкай затрымання з палітычных прычын”, — адзначаецца ў інструкцыі.
Згадваецца заява экспертаў ААН на сайце Упраўлення вярхоўнага камісара ААН па правах чалавека ад 20 верасня 2023 года. У ёй канстатавалася абмежаванне правоў беларусаў і ўтрымліваўся заклік да дзяржаў — членаў ААН дзейнічаць адпаведна іх міжнародным абавязацельствам і садзейнічаць беларусам, якія не могуць бяспечна вярнуцца на радзіму, атрымліваць дакументы, што дазваляюць карыстацца асноўнымі паслугамі і забяспечваюць свабоду руху.
У інструкцыі прыводзіцца таксама заява Савета Еўрапейскага саюза ад 19 лютага 2024 года, у якой асуджаецца “пашпартны” ўказ і пацвярджаецца курс на падтрымку пацярпелых ад рэпрэсій.
Пералічваюцца краіны ЕС, якія ўжо прызналі пратэрмінаваныя беларускія пашпарты: Аўстрыя, Кіпр, Літва, Францыя, Швецыя, Эстонія.
Далучыцца да гэтага спіса Іспанія вырашыла “ў свеце названых прычын” і праз яе адданасць захаванню правоў чалавека ў Беларусі.
Паводле інфармацыі офіса Ціханоўскай, інструкцыя стала вынікам дамоўленасці з іспанскімі ўладамі падчас візіту дэмлідара ў Мадрыд у чэрвені 2025 года.
Гэтую ж тэму абмяркоўваў яе дарадца па дыпламатычных пытаннях Дзяніс Кучынскі 18 студзеня 2026 года ў Мадрыдзе на перамовах з дзяржаўным сакратаром МЗС Іспаніі Дыега Марцінесам Беліа.
