Зяленскі — Еўропе: Ніхто не дапамог народу Беларусі ў 2020 годзе, і цяпер “Орешник” дастае да большасці еўрапейскіх сталіц

22 студзеня, Позірк. “Калі ты адмаўляешся дапамагаць народу, які б’ецца за свабоду, наступствы вяртаюцца, і яны заўсёды негатыўныя. Беларусь у 2020 годзе — гэта прыклад”. Такую заяву зрабіў прэзідэнт Украіны Уладзімір Зяленскі, выступаючы 22 студзеня на Сусветным эканамічным форуме ў Давосе (Швейцарыя).

“Ніхто не дапамог яе народу, і цяпер расійскія ракеты “Орешник“ разгорнутыя ў Беларусі і дастаюць да большасці еўрапейскіх сталіц“, — адзначыў Зяленскі.

На яго думку, гэтага не адбылося б, калі б беларускі народ атрымаў перамогу ў 2020 годзе. “І мы гаварылі сваім еўрапейскім партнёрам шмат разоў: дзейнічайце проста зараз супраць гэтых ракет у Беларусі. Ракеты ніколі не бываюць проста дэкарацыяй. Але Еўропа дагэтуль у “рэжыме Грэнландыі” (слабая рэакцыя на імкненне ЗША анэксаваць гэты дацкі востраў. — “Позірк“.): можа, калісьці нехта нешта зробіць”, — заявіў украінскі кіраўнік.

Галоўнай тэмай звароту кіраўніка ўкраінскай дзяржавы да ўдзельнікаў стала нерашучасць краін заходняй дэмакратыі ў дачыненні да дыктатараў і дыктатарскіх рэжымаў.

У якасці прыкладу Зяленскі прывёў створаны прэзідэнтам ЗША Дональдам Трампам “Савет міру“, куды былі запрошаныя як і Украіна, так і Расія з Беларуссю, “хоць вайна не спынілася“, “нават няма спынення агню”. “Еўропа нават не сфармулявала адзіную пазіцыю адносна амерыканскай ідэі”, — адзначыў прэзідэнт.