За мінулы тыдзень хворых на ВРВІ стала на 18% больш у параўнанні з папярэднім — Мінздароўя

3 лютага, Позірк. З 26 студзеня па 1 лютага ў Беларусі хворых на вострыя рэспіраторныя вірусныя інфекцыі стала на 18% больш у параўнанні з папярэднім тыднем, паведамляе прэс-служба Міністэрства аховы здароўя.

Адзначаецца, што 64,6% хворых — дзеці.

Пры гэтым ведамства не пазначае канкрэтную колькасць хворых на ВРВІ.

Паводле інфармацыі Мінздароўя, на фоне “працяглай цыркуляцыі ўзбуджальнікаў негрыпозных ВРВІ” (метапнеўмавірусы, РС-вірус, рынавірусы, адэнавірусы, сезонны каранавірус, вірусы парагрыпу, бакапарвавірусы, вірус SARS-CoV-2) адзначаецца “актыўная цыркуляцыя” вірусаў грыпу A, пераважна А (H3N2).

Для прафілактыкі міністэрства заклікала абмежаваць час наведвання месцаў ці мерапрыемстваў, дзе ў закрытых памяшканнях знаходзіцца вялікая колькасць людзей, а таксама кантакты з хворымі людзьмі.

У выпадку захворвання трэба заставацца дома, звярнуцца да ўрача і выконваць яго рэкамендацыі.