Музыка Алег Хаменка прыгавораны да трох год пазбаўлення волі

5 сакавіка, Позірк. Мінскі гарадскі суд 4 сакавіка прыгаварыў 58-гадовага музыку Алега Хаменку да трох гадоў пазбаўлення волі ў калоніі агульнага рэжыму паводле арт. 361⁴ (садзейнічанне экстрэмісцкай дзейнасці), паведамляе Беларуская асацыяцыя журналістаў.

Яму таксама прызначаны штраф у памеры больш за 20 тыс. рублёў

Судовы працэс у дачыненні да Хаменкі пачаўся 19 лютага 2026 года.

Вядома, што на экспертызу былі накіраваныя выпускі музычных праграм Хаменкі на “Радыё Рацыя” (Польшча), раней прызнаным “экстрэмісцкім фарміраваннем”. Такім чынам, абвінавачанне звязанае з супрацоўніцтвам з радыёстанцыяй, адзначае БАЖ.

Хаменка быў затрыманы ў Мінску 17 чэрвеня 2025 года пасля ператрусу ў ягонай кватэры.

9 ліпеня мінулага года беларуская праваабарончая супольнасць прызнала музыку палітвязнем.

Хаменка — вядомы ў Беларусі музыка, радыёвядучы, прадзюсар і папулярызатар беларускай музычнай культуры. Лідар фолк-гурта “Палац”.

Выкладаў у Беларускім універсітэце культуры і мастацтваў. У 2008 годзе пры падтрымцы дзіцячага фонду ЮНІСЕФ сумесна з Тамарай Лісіцкай і Людмілай Рыжковай запісаў і выпусціў для дзяцей серыю аўдыёказак “Беларускія народныя казкі”, быў вядучым музычнага фестывалю “Камяніца”, які штогод праводзіўся пад Мінскам.

Вядучы радыёверсіі хіт-парада Tuzin.fm “Тузін хітоў” на “Радыё Рацыя” і аўтарскай праграмы “Фолк брама”. Быў вядучым праграмы “Брама Існасці” на радыёстанцыі “Аўтарадыё” аж да яе закрыцця 12 студзеня 2011 года па палітычных матывах.

У складзе гурта “Палац“ здымаўся ў мастацкім фільме “Анастасія Слуцкая“, а таксама ў якасці камео ў серыяле “Вышэй за неба“.