Беларускія спартсмены завяршылі выступленні на Паралімпіядзе

15 сакавіка, Позірк. Беларускія спартсмены завяршылі выступленні на Паралімпійскіх гульнях.

15 сакавіка ў праграме спаборніцтваў былі прадстаўленыя ўсе чацвёра лыжнікаў, аднак Раман Свірыдзенка, Лідзія Лобан, Валянціна Бірыла і Дар’я Фядзьковіч фінішавалі далёка ад прызавых месцаў.

Напярэдадні ў змяшанай эстафеце беларусы занялі 9-е месца.

На Паралімпіядзе беларускія спартсмены выйгралі два медалі. Абодва — залаты і срэбны — у актыве Свірыдзенкі.

Цяпер Беларусь займае 17-е месца (з 25) у агульным медальным заліку.

Паралімпійскія гульні праходзяць у Мілане і Карціна-д’Ампеца (Італія) з 6 па 15 сакавіка.

Шэраг краін байкатавалі цырымонію адкрыцця Паралімпіяды ў знак пратэсту супраць допуску да спаборніцтваў з дзяржсімволікай спартсменаў з Беларусі і РФ.

Цырымонія закрыцця пачнецца 15 сакавіка ў 22:30 па беларускім часе.