Мінск паведаміць “партнёрам з Літвы і Польшчы” пра рашэнне па фурах з літоўскай рэгістрацыяй, што захраслі ў Беларусі

17 сакавіка, Позірк. Беларускі бок прыме рашэнне па фурах з літоўскай рэгістрацыяй і “паведаміць партнёрам з Літвы і Польшчы”, заявіў намеснік міністра замежных спраў Ігар Сакрэта 17 сакавіка па выніках сустрэчы прадстаўнікоў урада на чале з прэм’ер-міністрам Аляксандрам Турчыным і прадстаўнікоў перавозчыкаў са згаданых краін.

“Мы выслухалі ўважліва практычна кожнага, хто хацеў выказацца, — заявіў чыноўнік (на падставе матэрыялаў прэс-службы Савета міністраў). — У кожнага прадпрымальніка свая сітуацыя, свая колькасць транспарту, рухомага састава. Нам было цікава гэта пачуць, таму што мы не маем афіцыйнага канала камунікацыі з Вільнюсам, атрымаць рэлевантную інфармацыю, нават з польскага боку, мы не змаглі. Таму было прынятае рашэнне разгледзець, усебакова вывучыць звароты і прыняць гэтых людзей для таго, каб самім даведацца, якая сітуацыя”.

“Безумоўна, беларускія арганізацыі-эксплуатанты, на стаянках якіх знаходзяцца транспартныя сродкі, счэпкі, прычэпы, паўпрычэпы, панеслі пэўныя выдаткі. Гэтыя выдаткі неабходна будзе кампенсаваць. Рашэнне, якім будзе памер аплаты, як яна будзе выстаўляцца, што будзе ўлічвацца пры разліку гэтага кошту, будзе прынятае пасля таго, як будзе падрыхтаваны даклад. Прыкладна на працягу тыдня прэм’ер-міністр чакае рашэння па гэтым пытанні. Гэтыя пытанні будуць дакладвацца адпаведным чынам і ў вызначаным парадку будуць прымацца рашэнні, пра якія мы праінфармуем нашых партнёраў з Літвы і Польшчы”, — дадаў Сакрэта.

Пра сустрэчу Турчына з літоўскімі і польскімі аўтаперавозчыкамі на даручэнне Аляксандра Лукашэнкі прэс-служба ўрада паведаміла ранкам 17 сакавіка. Было заяўлена, што падставай для перагавораў стала “сітуацыя, што цяпер склалася, у якой апынуўся бізнес сумежных краін праз пазіцыю літоўскіх уладаў”.

Адкрываючы сустрэчу, Турчын заявіў, што “нягледзячы на ​​магчымасць канфіскацыі транспартных сродкаў, беларускі бок дакладна не мае намераў і жадання гэтым скарыстацца. Наше жаданне — канструктыўна дамовіцца і выйсці з сітуацыі”.

2 сакавіка Нацыянальная асацыяцыя аўтамабільных перавозчыкаў Літвы (LINAVA) накіравала афіцыйны зварот у Еўракамісію наконт затрыманых у Беларусі транспартных сродкаў літоўскіх і іншых перавозчыкаў з Еўрасаюза, а таксама наконт значнай маёмаснай шкоды, нанесенай гэтымі дзеяннямі.

У звароце адзначалася, што, паводле сабраных асацыяцыяй даных, на тэрыторыі Беларусі затрымана не менш за 1.071 транспартны сродак, які належыць як мінімум 149 літоўскім транспартным кампаніям. З іх 496 — грузавыя цягачы, 575 — паўпрычэпы ды іншая транспартная тэхніка. Агульны ідэнтыфікаваны кошт затрыманай маёмасці складае 15 млн 907,02 тыс. еўра.

Пры гэтым “дадаткова шэсць кампаній” папярэдне паведамілі, што ў Беларусі можа быць затрымана яшчэ каля 400 транспартных сродкаў. Калі гэтыя звесткі пацвердзяцца, агульная колькасць патэнцыйна затрыманых транспартных сродкаў можа скласці 1.472, а іх кошт — 21 млн 922,02 тыс. еўра, адзначалася ў звароце.

Паводле звестак LINAVA, “беларускія органы выстаўляюць дадатковыя фінансавыя патрабаванні — да 120 еўра за кожны транспартны сродак за дзень, а таксама згадваецца пра магчымую канфіскацыю транспартных сродкаў праз чатыры месяцы”. Такая сітуацыя “выклікае сур’ёзныя сумневы ў дачыненні да прапарцыйнасці, абароны законных чаканняў і забеспячэння права ўласнасці”.

Напрыканцы кастрычніка 2025 года Вільнюс закрыў пункты пропуску Мядзінінкай (з беларускага боку Каменны Лог) і Шальчынінкай (Беняконі), дамагаючыся такім чынам рэакцыі Мінска на масавы прылёт з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.

Пагранпераходы аднавілі працу 20 лістапада. За тры тыдні, пакуль яны былі закрытыя, рэжым Лукашэнкі паспеў пастрожыць правілы знаходжання ў краіне літоўскага грузавога транспарту, увязаўшы іх з працай пунктаў пропуску. Паведамлялася, што ў Беларусі захрасла каля 1,3 тыс. зарэгістраваных у Літве грузавікоў, якія не могуць выехаць з краіны нават пры адкрытай мяжы.

Пры гэтым Мінск настойвае, што далейшыя перагаворы з Вільнюсам па гэтым пытанні маюць весціся на палітычным узроўні.