У Гомелі 17-гадовы навучэнец каледжа забіў аднагрупніка

25 сакавіка, Позірк. У Гомелі навучэнец каледжа ўдарыў нажом аднагрупніка, раненне стала смяротным, паведамляе Следчы камітэт.

Канфлікт паміж двума 17-гадовымі навучэнцамі здарыўся падчас праходжання практыкі на навучальным палігоне раніцай 25 сакавіка. У выніку адзін з маладых людзей нанёс нажавое раненне аднагрупніку, які памёр у бальніцы.

Гомельскі гарадскі аддзел Следчага камітэта распачаў крымінальную справу паводле ч. 1 арт. 139 Крымінальнага кодэкса (забойства).

Следчыя працуюць з затрыманым непаўналетнім, дапытваюць удзельнікаў інцыдэнту і адміністрацыю ўстановы адукацыі. Асаблівая ўвага будзе нададзеная высвятленню прычын і ўмоў, якія прывялі да трагедыі, адзначае СК.

У 2025 годзе за здзяйсненне розных злачынстваў асуджана 430 непаўналетніх — на 27,5% менш, чым у 2024-м (593), сведчаць звесткі Вярхоўнага суда. У “злачынствах супраць жыцця і здароўя ” прызнана вінаватымі 20 непаўналетніх. Палова з іх — за наўмыснае прычыненне цяжкага цялеснага пашкоджання (арт. 147 КК), шэсць — за наўмыснае прычыненне менш цяжкага цялеснага пашкоджання (арт. 149), трое — за забойства (арт. 139), адзін — за прычыненне смерці па неасцярожнасці (арт. 144).