ЕАБР асцярожна прагназуе пашырэнне спажывецкай актыўнасці ў Беларусі

1 чэрвеня, Позірк. Захаванне “ўстойлівага росту рэальных заробкаў” у Беларусі канстатуецца ў чарговым макраэканамічным аглядзе Еўразійскага банка развіцця, апублікаваным 1 чэрвеня.

Аналітыкі звярнулі ўвагу на тое, што ў красавіку 2026 года рэальныя заробкі ў краіне павялічыліся на 6,7% у гадавым вылічэнні пасля росту на 8,1% у сакавіку.

Пры гэтым адзначаецца, што ў бюджэтным сектары дынаміка застаецца вышэйшай за сярэднюю па эканоміцы: рост рэальнай аплаты працы, адзначылі эксперты, паскорыўся да 9,7% у гадавым вылічэнні пасля 9,2% месяцам раней.

ЕАБР лічыць, што ва ўмовах запаволення інфляцыі падвышэнне заробкаў працягне падтрымліваць рост рэальных наяўных даходаў насельніцтва, якія ў студзені — сакавіку 2026 года павялічыліся на 7,6% у гадавым вылічэнні. На думку аналітыкаў, гэта “стварае ўмовы для далейшага пашырэння спажывецкай актыўнасці”.

Варта адзначыць, што намінальны налічаны сярэдні зарабак работнікаў Беларусі ў красавіку 2026 года, паводле даных Белстата, склаў 2.952,9 рубля — на 22,9 менш (-0,8%), чым у сакавіку (2.975,8). У студзені ён быў роўны 2.757,1 рубля, у лютым — 2.743, сакавіку — 2.975,8.

У 2025 годзе прадукцыйнасць працы павялічылася на 1%, а рэальны заробак — на 9%, заявіў Аляксандр Лукашэнка 17 лютага, заслухоўваючы справаздачу ўрада за 2025 год.

“Больш за тое, гэтая тэндэнцыя цягнецца не першы год. Які кошт такому дабрабыту, які мы выпінаем як вялікае дасягненне?” — задаў ён рытарычнае пытанне.

З аднаго боку, адзначыў спікер, Савет міністраў запэўнівае, што праз заробак атрымліваецца ўтрымліваць патрэбныя кадры, а з іншага — паводле прадукцыйнасці працы Беларусь “у 2–3 разы” адстае ад “развітых краін”.

“Дык, можа, трэба павялічваць аддачу? Калі кадры трымаеце, кадры павінны ўпірацца і працаваць. І не ў пасрэдніцкіх структурах, а на вытворчасці”, — падкрэсліў ён.

Палітык запатрабаваў збалансаваць “усе плыні ў эканоміцы”, каб пасля не прыйшлося “гераічна выпраўляць памылкі або, горш за тое, пакінуць іх будучым кіраванцам”.

Паводле яго слоў, маюць уражваць не высокія заробкі, а “наяўнасць арганізацый, дзе людзі з цяжкасцю зарабляюць паўтара мінімальныя заробкі, то бок пасля выліку падатку прыкладна 1,1 тысячы рублёў”.