У Беларусі па палітычных матывах арыштоўваюць грамадзян Літвы — кіраўнік ДДБ

31 траўня, Позірк. Беларусь “выкарыстоўвае палітычна матываваныя арышты грамадзян Літвы, спробы ціску і запалохвання”, заявіў дырэктар Дэпартамента дзяржаўнай бяспекі (ДДБ) балтыйскай дзяржавы Рэмігіюс Брыдыкіс на пасяджэнні Камітэта па дэмакратыі і бяспецы Парламенцкай асамблеі НАТО 31 траўня ў Вільнюсе.

Паводле кіраўніка спецслужбы, рэжым Аляксандра Лукашэнкі беспадстаўна затрымлівае літоўскіх грамадзян, а жыхары Беларусі “аказваюцца ў турмах толькі за чытанне выданняў, якія ўлады прызналі экстрэмісцкімі”.

“Мы не бачым ніякіх пазітыўных зменаў з боку Беларусі і лічым, што яна і далей будзе правакаваць або выкарыстоўваць розныя праблемы для ціску на бяспеку суседніх дзяржаў у сваіх інтарэсах”, — цытуе яго LRT са спасылкай на агенцтва BNS.

Пры гэтым у публікацыі не прыводзяцца канкрэтныя прыклады затрыманняў.

“Хоць Лукашэнка можа дэманстраваць цікавасць да паляпшэння адносін з Захадам, ён, верагодна, не збіраецца адварочвацца ад Расіі або мяняць аўтарытарную сістэму кіравання”, — дадаў Брыдзікіс.

Намеснік дырэктара 2-га дэпартамента аператыўных служб (ваеннай разведкі) Юлюс Кацінас заявіў, што ваенная залежнасць Мінска ад Масквы “з кожным годам змяншаецца”.

“На тэрыторыі Беларусі знаходзяцца расійскія ваенныя базы, сістэмы ранняга папярэджання, а таксама стратэгічныя сродкі супрацьпаветранай абароны Расіі. Беларусь дае сваю тэрыторыю для інфраструктуры, якая павышае эфектыўнасць расійскіх беспілотнікаў супраць Украіны”, — пералічыў ён.

Расійскія самалёты “зараз размешчаныя ў Беларусі для аперацый супраць Украіны”, сказаў прадстаўнік разведкі: “Акрамя таго, Беларусь размясціла на сваёй тэрыторыі расійскія ядзерныя ўзбраенні, што фактычна адпавядае распаўсюджванню ядзернай зброі”.

Паводле яго, ваенныя РФ “маюць практычна неабмежаваны доступ” да ​​беларускай тэрыторыі.

“Без дапамогі Беларусі <…> вайна [РФ супраць Украіны] наўрад ці была б магчымая”, — рэзюмаваў спікер.

31 сакавіка паведамлялася, што ў Беларусі да 15 гадоў пазбаўлення волі прыгавораны ў літоўскі грамадзянін Міраславас Троцкіс. 35-гадовы мужчына прызнаны вінаватым паводле арт. 358 (шпіянаж) і 358¹ (агентурная дзейнасць) КК.

Увосень 2024 года Троцкіс адправіўся наведаць сваякоў, але быў затрыманы, адзначалі праваабаронцы.

МЗС Літвы пацвердзіла прыгавор свайму грамадзяніну ў суседняй краіне.

“МЗС ужо не першы год настойліва рэкамендуе грамадзянам Літвы не ездзіць у Беларусь, а тым, хто знаходзіцца ў краіне, — неадкладна пакінуць яе з-за пагрозы быць затрыманымі”, — гаварылася ў заяве ведамства 1 красавіка (для грамадзян Літвы ў ліку іншых еўрапейскіх краін Мінскам у аднабаковым парадку ўведзены бязвізавы рэжым. — “Позірк”.).

Паводле даных ПЦ “Вясна”, на 20 студзеня 2026 года сама меней 22 замежніка мелі ў Беларусі статут палітычнага зняволенага. Палова з іх — грамадзяне РФ. Таксама статус мелі грамадзяне Ўкраіны, Літвы, Францыі, Латвіі, Польшчы.

Усяго з 2020 года ў пад палітычны крымінальны пераслед трапіла сама меней 100 замежных грамадзян (з іх 27 жанчын). Праваабаронцам было вядома, што як мінімум 75 з іх накіравалі ў калоніі.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Напад пачаўся ў тым ліку з беларускай тэрыторыі.