Украіна працягне ўмацоўваць мяжу з Беларуссю
20 чэрвеня, Позірк. Ахову мяжы з Беларуссю ў Валынскай і Ровенскай абласцях Украіны праверыў напрыканцы працоўнага тыдня в.а. кіраўніка Дзяржаўнай памежнай службы гэтай краіны Валерый Ваўрынюк.
Прэс-служба ДПСУ паведаміла, што “ў прыгранічнай зоне кіраўнік ведамства праверыў арганізацыю службы памежнікаў, якія штодня забяспечваюць недатыкальнасць мяжы ва ўмовах ваеннага становішча”, надаўшы “асаблівую ўвагу” пытанням “гатоўнасці падраздзяленняў да рэагавання на магчымыя пагрозы і далейшаму ўзмацненню абаронных магчымасцей”.
В.а. кіраўніка памежнага ведамства “азнаёміўся са станам інжынернага ўладкавання дзяржаўнай мяжы і фартыфікацыйнай інфраструктуры”, звярнуў увагу на “працу камандна-назіральных пунктаў, арганізацыю службы на аддаленых участках і наглядальных пастах, а таксама забеспячэнне абаронцаў неабходнай тэхнікай і ўзбраеннем”.
Ваўрынюк, як заяўлена, таксама пабываў на “цяжкадаступных участках мяжы, у тым ліку забалочаных і водных”, дзе “падрабязна азнаёміўся з арганізацыяй службы на гэтых кірунках”. Асаблівасць мясцовасці на Палессі, адзначыла ведамства, палягае ў наяўнасці “густых лясоў, забалочаных тэрыторый і складанага рэльефу”. Гэтыя прыродныя ўмовы з’яўляюцца “дадатковым фактарам пры арганізацыі аховы мяжы і адначасова патрабуюць ад памежнікаў высокай падрыхтоўкі, цягавітасці і эфектыўнага выкарыстання сучасных сродкаў кантролю”.
“Па выніках працы і сумеснай нарады, якая ў гэты час адбылася з удзелам кіраўнікоў органаў ваеннага кіравання, прадстаўнікоў абласных вайсковых адміністрацый і кіраўнікоў прыгранічных абшчын, былі вызначаныя першачарговыя задачы для падраздзяленняў па нарошчванні абароны дзяржаўнай мяжы, — гаворыцца ў паведамленні. — Сярод іх далейшае інжынернае ўладкаванне ўсіх участкаў, удасканаленне тэхнічных магчымасцей падраздзяленняў, у тым ліку сістэм аддаленага відэаназірання, паляпшэнне элементаў процідзеяння беспілотным лятучым апаратам, пастаянны маніторынг абстаноўкі і гатоўнасць да аператыўнага рэагавання на любыя змяненні”.
З інфармацыі рэгіянальнага анлайн-выдання “Журнал Жытоміра” вынікае, што ўмацоўваць мяжу з Беларуссю таксама працягне Жытомірская вобласць. 18 чэрвеня СМІ паведаміла, што пра гэта ішла гаворка на пашыранай нарадзе па пытаннях узмацнення ўкраінска-беларускай мяжы, у якой браў удзел у тым ліку Ваўрынюк.
“Удзельнікі абмеркавалі і ўзгаднілі комплекс мер, скіраваных на ўзмацненне абароны ўчастка дзяржаўнай мяжы, які праходзіць па тэрыторыі ўкраінскага Палесся, — адзначыла выданне. — У прыватнасці, гаворка ішла пра далейшае ўмацаванні абарончых рубяжоў, развіццё фартыфікацыйных збудаванняў і інжынернае ўладкаванне прыгранічнай інфраструктуры, а таксама пра стварэнне ўмоў для аператыўнага рэагавання на магчымыя пагрозы”.
“Асобная ўвага была нададзеная пытанням падвышэння эфектыўнасці сіл супрацьпаветранай абароны для процідзеяння варожым беспілотнікам ды іншым паветраным цэлям у прыгранічных раёнах”, — гаворыцца ў паведамленні.
Жытомірская вобласць Украіны мяжуе з Гомельскай вобласцю Беларусі, Ровенская — часткова з Гомельскай, але пераважна з Брэсцкай, Валынская — з Брэсцкай.
Украінскія ўлады ў апошні час усё часцей папярэджваюць пра імкненне Масквы непасрэдна ўцягнуць Мінск у вайну супраць Кіева.
24 лютага 2022 года Расія пачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Аляксандра Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак журналістаў-расследавальнікаў, многія беларускія прадпрыемствы зараз актыўна займаюцца вытворчасцю на карысць расійскага вайскова-прамысловага комплексу.
Зяленскі адвёў Лукашэнку тыдзень на зняцце рэтранслятараў для дронаў, заклікаў спыніць пастаўку нафтапрадуктаў расійскаму войску
19 чэрвеня, Позірк. Прэзідэнт Украіны Уладзімір Зяленскі даў Аляксандру Лукашэнку тыдзень на зняцце з вышак рэтранслятараў для навядзення дронаў уздоўж мяжы з Украінай. "Калі ён гэта не зробіць, зробім мы“, — заявіў Зяленскі 19 чэрвеня ў Кіеве на супольнай прэс-канферэнцыі …
