Доля кіберзлачынстваў перавысіла траціну ўсіх зарэгістраваных злачынстваў, колькасць пацярпелых дзяцей вырасла на 70% — МУС
15 ліпеня, Позірк. Доля кіберзлачынстваў паводле вынікаў студзеня — траўня 2026 года перавысіла траціну ўсіх зарэгістраваных у Беларусі злачынстваў і дасягнула 33,4%, вынікае са звестак МУС, якія ўключаныя ў матэрыялы для выкарыстання прапагандыстамі ў рамках ліпеньскага “адзінага дня інфармавання насельніцтва“.
У 2023 годзе, згодна з інфармацыяй міліцэйскага ведамства, удзельная вага кіберзлачыннасці складала 21,5%, у 2024-м — 27,5%, у 2025-м — 29,7%. У 2026 годзе штотыдзень здзяйсняецца ў сярэднім 359 кіберзлачынстваў, або больш за 50 у дзень.
Паводле звестак МУС, ахвярамі кіберзлачынцаў найчасцей становяцца маладыя людзі ва ўзросце ад 18 да 29 гадоў (удзельная вага 29,3%).
За пяць месяцаў 2026 года на 69,6% (са 158 да 268) вырасла колькасць непаўналетніх, прызнаных пацярпелымі ад кіберзлачынстваў.
Больш за 80% кіберзлачынстваў складаюць тры іх віды: ілжэпродаж тавару анлайн (37,6%), вішынг ад імя службовых асоб (33,8%), крадзеж з выкарыстаннем сацыяльных сетак (9,7%).
