Мытня абвяргае інфармацыю аб масавым затрыманні ў Беларусі калінінградскіх грузавікоў

12 жніўня, Позірк. Дзяржаўны мытны камітэт (ДМК) абвяргае ў сваім тэлеграм-канале інфармацыю аб масавым затрыманні ў Беларусі грузавікоў, якія прыбылі з Калінінградскай вобласці (РФ) праз Літву.

Заяўлена, што мытнымі органамі “забяспечваецца своечасовы выпуск з выкананнем заканадаўства транзітных тавараў, якія ў тым ліку прыбываюць з Калінінграда”.

Адзначаецца, што ў сярэднім за суткі праз беларуска-літоўскую мяжу ідзе каля 80 транспартных сродкаў з калінінградскай рэгістрацыяй. З пачатку года такіх аформлена парадку 17,5 тыс.

Паводле сцвярджэння ДМК, цяпер у у зонах мытнага кантролю на тэрыторыі Беларусі знаходзіцца 16 фур, якія належаць міжнародным перавозчыкам (11 з расійскай рэгістрацыяй), рух якіх прыпынены з-за “наяўных падстаў меркаваць аб парушэннях заканадаўства пры іх увозе”.

Гаворка ідзе пра адзін з распаўсюджаных спосабаў ухілення ад выплаты мытных плацяжоў — “перамяшчэнне транспартных сродкаў пад выглядам ужо зарэгістраваных у ЕАЭС”, падкрэслівае мытня. Для гэтага, як адзначаецца, парушальнікі падрабляюць vin-нумары, рэгістрацыйныя знакі, тэхнічныя пашпарты.

“Каб устанавіць такія парушэнні, неабходна кампетэнтным органам ажыццявіць адпаведныя праверачныя мерапрыемствы, у тым ліку экспертызы, на якія патрабуецца да 20 рабочых дзён“, — гаворыцца ў паведамленні.

Ведамства паведамляе, што за першае паўгоддзе 2026 года спынена 60 спробаў увозу падобным спосабам транспартных сродкаў, у тым ліку прычэпаў, 16 з якіх “маюць прыкметы крымінальна каральных“. Па незаконным увозе 26 транспартных сродкаў, агульны кошт якіх склаў звыш 1,8 млн рублёў, завершаныя адміністрацыйныя працэсы.

11 жніўня са спасылкай на расійскі рэгіянальны партал “Клопс” паведамлялася, што перавозчыкі з Калінінграда сутыкнуліся з масавай затрымкай грузавікоў у Беларусі.

Сцвярджалася, што расійскія машыны пры праходжанні літоўска-беларускай мяжы “здымаюць з лініі і пакідаюць на экспертызу”, якая “расцягваецца на некалькі месяцаў”.

Праблема, як паведамлялася, тычыцца не аднаго пункта пропуску на літоўска-беларускай мяжы, гаворка можа ісці прыкладна аб 300 машынах з Калінінграда.

Адметна, што беларуская мытня ў сваім рэлізе 12 жніўня абвяргае інфармацыю аб калінінградскіх фурах, якую, як яна заяўляе, распаўсюдзілі “асобныя крыніцы ў Telegram”. У рэчаіснасці, беларускія СМІ паведамілі пра гэта са спасылкай на згаданае рэгіянальнае СМІ “Клопс”, якое пры падрыхтоўцы публікацыі паразмаўляла прынамсі з адным прадстаўніком кампаніі-грузаперавозчыка з Калінінграда.