16 верасня, Позірк. Аб завяршэнні пошукаў зніклага на піку Курумды (Ісык-Кульская вобласць, Кыргызстан) 60-гадовага беларуса Мікалая Свірыдава паведаміў 15 верасня кіраўнік пошукава-выратавальнай аперацыі Аляксандр Смірноў.
Знайсці цела альпініста не ўдалося.
Паводле слоў Смірнова, у раёне пошукавай аперацыі пачаліся снегапады, пошукавая група “завяршае працу і сыходзіць з гары”.
“Аднаўляць пошукі мы не плануем”, — напісаў ён.
“За гэтыя паўтара месяца мы выкарысталі, здаецца, усё, што маглі, — адзначыў Смірноў. — Дроны, здольныя працаваць на вышыні да сямі тысяч метраў. Спадарожнікавыя здымкі. Аналіз снежнага покрыва. Каля ста чалавек з шасці краін, якія глядзелі здымкі, будавалі версіі, правяралі іх, зноў глядзелі”.
Беспілотнікі далі магчымасць убачыць схіл “амаль да каменя”, але “калі чалавек знаходзіцца пад лавінным вынасам або ў расколіне, з паветра яго не відаць”.
“З вялікай верагоднасцю ён знаходзіцца пад лавіннымі вынасамі або ў расколінах ніжэй па схіле. Убачыць гэта з паветра немагчыма. Абследаваць людзьмі — занадта небяспечна”, — канстатаваў кіраўнік групы.
Інжынер-канструктар з Мінска 43-гадовы Максім Палянскі, салігорскі інжынер, кандыдат у майстры спорту па турызме Мікалай Свірыдаў і 37-гадовы грамадзянін Літвы Сяргей Рубцоў 1 жніўня падняліся на пік Курумды, прайшоўшы маршрут па паўночным грэбні.
Днём пазней мужчыны выйшлі на сувязь у апошні раз. Да аўтамабіля, які чакаў іх 4 жніўня, яны не прыйшлі.
10 жніўня да раёна пошукаў выехала група з прафесійным БПЛА. Паведамлялася, што працаваць дрон будзе ў прамежках паміж снегападамі.
Раніцай 16 жніўня пры аблёце схілу дрон зняў месца сходу снежна-каменнай масы. Пры разборы запісаў, побач са знойдзенымі раней рэчамі, былі выяўленыя два целы, пазней іх спусцілі з гары.
27 жніўня УУС Ошскай вобласці паведаміла, што загінулымі аказаліся Палянскі і Рубцоў, іх целы апазналі блізкія.
Пік Курумды — гэта горная вяршыня вышынёй 6.614 метраў, якая знаходзіцца ва ўсходняй частцы Заалайскага хрыбта на мяжы Кыргызстана і Кітая. Маршрут мае высокую катэгорыю цяжкасці і лічыцца тэхнічна складаным.
