27 кастрычніка, Позірк. З асуджэннем “прымянення аднабаковых прымусовых мер, якія супярэчаць міжнароднаму праву”, выступілі ў сумеснай заяве па выніках працы XII Міжнароднага парламенцкага форуму БРІКС у Нью-Дэлі (Індыя; 26-27 кастрычніка) парламентарыі краін — членаў і партнёраў аб’яднання.
Дакумент апублікаваны на сайце расійскай Дзярждумы.
Такія меры, сцвярджаецца ў дакуменце, “у прыватнасці ў форме аднабаковых эканамічных санкцый і другасных санкцый, маюць працяглыя негатыўныя наступствы для правоў чалавека, уключаючы права на развіццё, а таксама для здароўя і харчовай бяспекі насельніцтва дзяржаў, супраць якіх яны накіраваныя”.
Парламентарыі заклікалі да скасавання “такіх незаконных захадаў, якія падрываюць міжнароднае права, а таксама прынцыпы і мэты Статута ААН”.
“Мы зноў пацвярджаем сваю прыхільнасць прынцыпам суверэннай роўнасці, узаемнай павагі, неўмяшання ва ўнутраныя справы і мірнага ўрэгулявання міжнародных спрэчак, замацаваным у Статуце Арганізацыі Аб’яднаных Нацый як асноватворным прынцыпам глабальнай стабільнасці, міру і развіцця”, — падкрэсліваецца ў дакуменце.
Парламентарыі “рашуча асудзілі” ўсе парушэнні міжнароднага гуманітарнага права, “уключаючы наўмысныя напады на грамадзянскіх асобаў і грамадзянскія аб’екты, у тым ліку на тэрыторыі дзяржаў — членаў БРІКС”, а таксама адмову ў наданні гуманітарнага доступу або стварэнне перашкод для яго і напады на супрацоўнікаў гуманітарных арганізацый.
У мерапрыемствах форуму ўдзельнічалі прадстаўнікі Расіі, Індыі, ААЭ, Кітая, Бразіліі, Ірана, Егіпта, Тайланда, Уганды, Беларусі, Кубы, Балівіі, Казахстана, Узбекістана. З 14 пералічаных краін, чые прадстаўнікі прымалі ўдзел у форуме БРІКС, пад рознымі формамі міжнародных санкцый знаходзяцца сем: Расія, Беларусь, Іран, Куба, Кітай, Уганда, Балівія.
Міністр замежных спраў Беларусі Максім Рыжанкоў, выступаючы 13 верасня ў Нью-Дэлі на саміце БРІКС, заявіў пра “рост ціску на краіны БРІКС з боку тых, хто працягвае імкнуцца да глабальнага дамінавання“. “Нас пастаянна спрабуюць запалохаць санкцыямі, эканамічнымі, гандлёвымі і фінансавымі абмежаваннямі, нелегітымнымі тарыфамі і іншымі мерамі прымусу”, — заявіў Рыжанкоў.
Мінск, які падаў заяўку на ўступленне ў БРІКС у 2023 годзе, у студзені 2025-га атрымаў статус дзяржавы — партнёра аб’яднання.
У 2006 годзе Бразілія, Расія, Індыя і Кітай пачалі працэс фармавання БРІК — садружнасці дзяржаў, заснаванага на прынцыпах эканамічнага супрацоўніцтва. Першы саміт БРІК, які азнаменаваў стварэнне аб’яднання, адбыўся ў чэрвені 2009 года.
У 2011-м Садружнасць БРІК было перайменавана ў БРІКС пасля далучэння Паўднёва-Афрыканскай Рэспублікі (С — South Arfica).
На пачатку 2024 года арганізацыя ператварылася ў БРІКС+ (часта “+” у назве апускаюць), калі ў яе прынялі Іран, Саудаўскую Аравію, Егіпет, Эфіопію і ААЭ. Аргенціна, якая атрымала афіцыйнае запрашэнне, адмовілася ад уступлення пасля прыходу да ўлады ў снежні 2023 года прэзідэнта Хаўера Мілея.
У студзені 2025 года паўнапраўным членам арганізацыі была абвешчаная Інданезія.
У 2020-х заяўкі на ўступленне ў БРІКС падалі Алжыр, Бангладэш, Бахрэйн. Цікавасць да патэнцыйнага далучэння праявілі Ангола, Афганістан, Венесуэла, Габон, Гвінея-Бісаў, Гандурас, Дэмакратычная Рэспубліка Конга, Зімбабвэ, Казахстан, каморы, Куба, Мексіка, Нігерыя, Нікарагуа, Пакістан, Сенегал, Сірыя, Судан, Тайланд, Туніс, Турцыя, Уганда і Уругвай.
Мінск падтрымлівае расійскую агрэсію ва Украіне — найбуйнейшым ваенным канфлікце ў Еўропе пасля заканчэння Другой сусветнай вайны. Войска РФ апошнія месяцы значна павялічыла колькасць атак на грамадзянскія аб’екты ва Украіне, што прывяло да росту ахвяраў сярод мірнага насельніцтіва.
Аўтарызавацца
Забыліся пароль?
Выхад з профілю
