Сусветная арганізацыя аховы здароўя “задаволеная супрацоўніцтвам” з Беларуссю

21 верасня, BPN. Сусветная арганізацыя аховы здароўя (СААЗ) “задаволеная супрацоўніцтвам” з Беларуссю, заявіў краінавы прадстаўнік СААЗ Сяргей Дзіёрдзіца.

21 верасня прадстаўнік арганізацыі сустрэўся з міністрам аховы здароўя Беларусі Дзмітрыем Піневічам, паведамляе прэс-служба Міністэрства аховы здароўя.

Паводле слоў Дзіёрдзіцы, “эфектыўнасць узаемадзеяння” афіцыйнага Мінска і СААЗ пацвярджае той факт, што Беларусь выбрана ў склад выканаўчага камітэта арганізацыі на 2021–2024 гады.

Бакі абмеркавалі “новыя праекты і планы па развіццю супрацоўніцтва” Беларусі з СААЗ. Піневіч падкрэсліў, што Сусветная арганізацыя аховы здароўя “грае вядучую ролю ў выпрацоўцы сумесных праграм з іншымі агенцтвамі ААН і аказвае дапамогу Беларусі”.

“Гэта было выдзяленне рэсурсаў ва ўмовах ковіда, наша ўзаемадзеянне з Сусветным банкам (да моманту ўвядзення санкцый). СААЗ у большай ступені адыгрывала каардынуючую ролю, ролю правадніка і эксперта для Сусветнага банка”, — сказаў беларускі чыноўнік.

Кандыдат медыцынскіх навук Сяргей Дзіёрдзіца прыступіў да выканання абавязкаў прадстаўніка СААЗ у Беларусі — кіраўніка краінавага офіса СААЗ 17 жніўня 2022 года. 14 верасня ён уручыў копіі даверчых грамат намесніку міністра замежных спраў Юрыю Амбразевічу.

Дзіёрдзіца грамадзянін Расіі. Мае ступень магістра медыцынскіх навук у галіне медыцынскай паразіталогіі і трапічнай медыцыны. Да прызначэння ў Беларусь працаваў прадстаўніком СААЗ у Манголіі, Бангладэш, быў каардынатарам аддзела пашыранай праграмы імунізацыі ў Бюро СААЗ для заходняй часткі Ціхага акіяна.

Каментуючы сваё прызначэнне ў Беларусь, ён сказаў, што СААЗ працягне прадастаўляць ураду навукова-абгрунтаваную тэхнічную і праграмную дапамогу ў адпаведнасці з двухгадовым планам супрацоўніцтва з Беларуссю.

Таксама ён заяўляў, што СААЗ засяродзіць увагу на ўмацаванні партнёрства і супрацоўніцтва ў інтарэсах аховы здароўя, пашырэнні выкарыстання інфармацыйных тэхналогій для аховы здароўя, падтрымцы патэнцыялу краіны па забеспячэнні гатоўнасці і рэагавання ў сувязі з COVID-19 і будучымі надзвычайнымі сітуацыямі ў галіне аховы здароўя і інш.

Сусветная арганізацыя аховы здароўя з’яўляецца спецыялізаванай установай ААН. У кастрычніку 2021 года прадстаўнік генсека ААН Стэфан Дзюжаррык заявіў, што ААН знаходзіцца ў кантакце з уладамі Беларусі і спадзяецца захаваць сваю місію ў Беларусі.

Падчас выступлення ў СААЗ 24 траўня Піневіч заклікаў арганізацыю садзейнічаць пастаўкам медыкаментаў і медабсталявання ў Беларусь, а таксама прадаўжэнню міжнароднай тэхнічнай дапамогі. Супрацоўніцтва з Беларуссю ў выглядзе міжнароднай тэхнічнай дапамогі было прыпынена амаль ва ўсіх кірунках у сувязі з рэпрэсіямі пасля прэзідэнцкіх выбараў 2020 года і ўдзелам краіны ў расійскай агрэсіі супраць Украіны.

У траўні 2021 года, калі супрацоўніцтва яшчэ ажыццяўлялася, а дапамога прадастаўлялася, Аляксандр Лукашэнка абвінаваціў СААЗ, Еўрасаюз і ЗША ў тым, што яны не дапамаглі прафінансаваць антыкавідныя меры ў Беларусі.

“Апошнія мярзотнікі гэтыя еўрапейцы і амерыканцы. Яны ж нічым не дапамаглі нам, абсалютна. Хаця і СААЗ, і ААН пастаянна заяўляюць, што трэба падтрымаць кагосьці і іншае”, — сказаў ён.

Аднак толькі ў рамках праекта ініцыятывы “Салідарнасць у імя здароўя”, які фінансаваўся Еўрасаюзам, з сакавіка 2020 года па сакавік 2022-га Беларусі было выдзелена 5,3 млн долараў.

Рэанімацыйная служба была істотна мадэрнізаваная за кошт рэалізацыі праекта Сусветнага банка “Экстраннае рэагаванне на COVID-19” з фінансавай падтрымкай у памеры 90 млн еўра. Гэты праект дапаўняў доўгатэрміновую падтрымку СБ па ўмацаванні сістэмы аховы здароўя Беларусі, часткай якой быў праект “Мадэрнізацыя сістэмы аховы здароўя Рэспублікі Беларусь”. У рамках гэтага праекта краіна ў 2017 годзе атрымала пазыку ў памеры 125 млн долараў згодна з запытам урада.