4 жніўня, Позірк. Агенцтва ўнутранай бяспекі (АУБ) Польшчы затрымала 39-гадовага грамадзяніна Беларусі Міхаіла А., які падазраецца ў шпіянажы на карысць Расіі, паведамляе Polsat са спасылкай на міністра ўнутраных спраў і адміністрацыі Марыюша Каміньскага.
Адзначаецца, што гэта шаснаццаты затрыманы ў рамках адпаведнай справы (папярэдні затрыманы выявіўся ўкраінцам).
Мужчына знаходзіўся ў Польшчы з 2021 года, быў затрыманы 1 жніўня 2023-га. Каміньскі заявіў, што той “вёў разведку ў адносінах да вайсковых аб’ектаў і партоў”, за што “сістэматычна атрымліваў узнагароду ад расіян”.
У чэрвені вайсковы дэпартамент акруговай пракуратуры ў Познані (Польшча) завяршыў расследаванне ў дачыненні да двух грамадзян Беларусі, затрыманых у красавіку 2022-га, матэрыялы справы перададзеныя ў суд. Паводле інфармацыі партала rmf24.pl, фігурантаў справы абвінавачваюць у шпіянажы на карысць беларускай вайсковай выведкі, ім пагражае да 10 гадоў пазбаўлення волі.
Раней Служба вайсковай контрвыведкі (СВК) Польшчы паведамляла, што ў 2022 годзе “польскія службы ўжо затрымалі 20 чалавек, якія падазраюцца ў супрацоўніцтве з расійскай або беларускай выведкай”.
Аўтарызавацца
Забыліся пароль?
Выхад з профілю
