Краіны ЕС за мінулыя суткі не дазволілі нелегальна трапіць 126 мігрантам з тэрыторыі Беларусі

21 траўня, BPN. За папярэдні дзень, 20 траўня, краіны Еўрасаюза не дазволілі нелегальна прабрацца 126 мігрантам з тэрыторыі Беларусі (суткамі раней — 197).

Служба аховы дзяржаўнай мяжы Літвы зафіксавала 11 спроб незаконнага перасячэння мяжы з беларускага боку (20).

Літоўскае ведамства са спасылкай на калег з Дзяржаўнай пагранічнай аховы Латвіі паведаміла, што ў папярэдні дзень папярэджана 34 спробы нелегальнага пераходу беларуска-латвійскай мяжы (91).

Паводле інфармацыі Памежнай аховы Польшчы, за мінулыя суткі мяжу з боку Беларусі спрабавалі нелегальна перасекчы 81 замежнік (86), у тым ліку з Марока, Нігерыі і Індыі. Група з 13 мігрантаў закідала памежнікаў камянямі. Адзначаецца, што некаторыя нелегалы былі ў масках і з рацыямі. Ведамства публікуе фатаграфію з месца надзвычайнага здарэння, адзначаючы, што нелегальная міграцыя падтрымліваецца беларускімі ўладамі.

З пачатку года зафіксавана 13.935 спроб незаконнага пранікнення ў ЕС з беларускай тэрыторыі (у Польшчу — 9.585, Латвію — 3.278, Літву — 1.073), у тым ліку з пачатку траўня — 3.135.

Памесячная статыстыка, якую вывеў BPN на падставе штодзённых звестак, сведчыць аб росце напружанасці на мяжы Беларусі і ЕС: у студзені было зроблена 1.989 спроб нелегальнага пераходу мяжы, лютым — 1.970, сакавіку — 3.401, красавіку — 3.440.

Разбіўка па краінах: Польшча — 1.398 у студзені, 1.455 у лютым, 2.583 у сакавіку, 2.363 у красавіку; Латвія — 372 у студзені, 377 у лютым, 559 у сакавіку, 776 у красавіку; Літва — 219 у студзені, 138 у лютым, 259 у сакавіку, 301 у красавіку.

Міграцыйны крызіс на граніцы Беларусі і краін ЕС пачаўся вясной 2021 года. Спачатку шматразовае павелічэнне колькасці нелегальных мігрантаў адчула Літва. Пасля таго як Вільнюс прыняў рашэнне не затрымліваць мігрантаў, а вяртаць у Беларусь, плыні нелегалаў пераарыентаваліся на Польшчу, а затым на Латвію.

Да пачатку вайны ва Украіне ў лютым 2022 года міграцыйныя патокі істотна скараціліся, але пасля зноў выраслі. Самы папулярны кірунак, як сведчыць статыстыка, — польскі.

Кіраўніцтва дзяржаў Балтыі і Польшчы ўсклала адказнасць за міграцыйны крызіс на мяжы на беларускія ўлады, тыя ў адказ назвалі прычынай крызісу дзеянні Захаду ў краінах, адкуль прыбываюць мігранты.