Затрымка аўтобусаў на беларуска-літоўскай мяжы дасягае паўсутак

13 ліпеня, Позірк. 13 гадзін дасягала на гэтым тыдні затрымка пасажырскіх аўтобусаў, якія перасякаюць беларуска-літоўскую мяжу, вынікае з праведзенага “Позіркам“ аналізу паведамленняў перавозчыка “Мінсктранс“.

11 ліпеня аўтобус Мінск — Рыга выехаў з літоўскай мяжы ў 14.34 замест 1.35.

7 ліпеня затрымка склала 8 гадзін (выехаў у 9.38), 12-га — амаль 10 (11.29).

10 ліпеня аўтобус Мінск — Вільнюс замест 5.35 адправіўся ад мяжы на 11 гадзін пазней. Гэты дзень, мяркуючы па інфармацыі перавозчыка, стаў самым напружаным: у чарзе стаяла адразу шэсць рэйсавых аўтобусаў.

Раней была зафіксавана 13-гадзінная затрымка аўтобуса гэтага маршруту: рэйс замест 15.50 4 ліпеня працягнуўся ў 4.50 5 ліпеня. Чарга на беларускай мяжы на працягу другой паловы сутак вырасла з 5 да 10 аўтобусаў.

Да вечара 12 ліпеня хуткасць праходжання мяжы трохі павялічылася. З апошняга паведамлення “Мінсктранса” за гэты дзень вынікала, што затрымка аўтобуса склала каля 5,5 гадзіны. За кошт скарачэння стаянкі ў Вільнюсе адставанне ад графіка зменшылася на 2,5 гадзіны: зваротны выезд быў запланаваны на 3 гадзіны пазней планавага (у 22.00 замест 19.00).

На польскім напрамку перавозчык рэдка паведамляе пра значныя затрымкі. Прыклад: рэйс Мюнхен — Мінск замест 4 ліпеня стартаваў роўна на суткі пазней.

Паводле інфармацыі Дзяржпагранкамітэта, у 2 гадзіны ночы 13 ліпеня ў пункце пропуску Брэст на мяжы з Польшчай выезду чакала 14 аўтобусаў, Каменны Лог на мяжы з Літвой — 2.

Тэлеграм-канал “Мінсктранса” аб руху аўтобусаў міжнародных маршрутаў быў створаны ў жніўні 2024 года на фоне вялікіх чэргаў на межах. На яго падпісалася больш за 13 тыс. чалавек. Узімку іх стала на некалькі сотняў менш, аднак цяпер колькасць падпісчыкаў перавысіла 16 тыс.