9 жніўня, Позірк. Злучаныя Штаты Амерыкі пашырылі санкцыі супраць беларускага рэжыму “ў сувязі з трохгадовай гадавінай сфальсіфікаваных прэзідэнцкіх выбараў у жніўні 2020 года”, паведаміла 9 жніўня Упраўленне па кантролі над замежнымі актывамі Міністэрства фінансаў ЗША.
Санкцыі ўводзяцца арганізацый, “датычных да рэпрэсій беларускага рэжыму супраць грамадзянскай супольнасці, якія працягваюцца, саўдзелу ў неапраўданай вайне Расійскай Федэрацыі ва Украіне і ўзбагачэнні лідэра рэпрэсіўнага беларускага рэжыму Аляксандра Лукашэнкі”.
У санкцыйны спіс унесены авіякампанія “Белавія”, Дэпартамент фінансавых расследаванняў Камітэта дзяржаўнага кантролю (ДФР КДК), Беларускі металургічны завод (БМЗ), ТАА “БелКапСтыл” (амерыканскі дылер БМЗ), Мінскі завод грамадзянскай авіяцыі.
Увайшлі ў спіс фізічныя асобы: сыны і жонка бізнесмена Аляксея Алексіна Дзмітрый, Віталь і Іна, а таксама дырэктар ДФР КДК Ігар Маршалаў, яго намеснікі Дзмітрый Францкевіч, Ігар Сяліцкі, старшы інспектар па асабліва важных справах ДФР Арцём Дунько. Акрамя таго, санкцыі ўведзены супраць гендырэктара БМЗ Дзмітрыя Корчыка.
Пад санкцыі трапіў урадавы самалёт Canadair Regional Jet CR-200ER (бартавы нумар EW-301PJ), які “выкарыстоўваецца высокапастаўленымі чыноўнікамі і членамі сям’і лідара рэжыму Аляксандра Лукашэнкі, які знаходзіцца пад санкцыямі ЗША”.
“Разам з партнёрамі і саюзнікамі мы будзем і надалей рабіць так, каб рэжым плаціў цану за жудаснае абыходжанне са сваімі ўласнымі грамадзянамі і каб нашы меры ў адказ на расійскую агрэсію нельга было абысці праз Беларусь”, — падкрэсліў Мінфін ЗША.
8 жніўня санкцыі супраць беларускіх прадпрыемстваў увяла Вялікабрытанія. Яны закранулі холдынг “БелОМА”, Гомельскі радыёзавод, ААТ “Кідма тэк”, Аршанскі авіярамонтны завод, ААТ “Пеленг” і ААТ “2566 завод па рамонце радыёэлектроннага ўзбраення”.
Аўтарызавацца
Забыліся пароль?
Выхад з профілю
