Беларусь і РФ плануюць распрацаваць дапаможнік для школьнікаў па “агульнай гісторыі Саюзнай дзяржавы”

4 кастрычніка, Позірк. Дапаможнік па “агульнай гісторыі Саюзнай дзяржавы” для навучэнцаў беларускіх і расійскіх устаноў сярэдняй адукацыі плануецца распрацаваць у 2024 годзе, паведаміў намеснік міністра адукацыі Аляксандр Кадлубай 3 кастрычніка ў Мінску на форуме “Расія і Беларусь: агульная гісторыя, агульны лёс”.

Паводле слоў чыноўніка, якія перадае шэраг дзяржаўных медыя абедзвюх краін, выданне гэтага падручніка дапаможа “супрацьстаяць спробам скажэння і фальсіфікацыі гістарычных фактаў”.

“[Ён дапаможа] выпрацаваць агульны погляд на мінулае, які будзе садзейнічаць кансалідацыі грамадства, выхаванню патрыятычных і грамадзянскіх якасцей падрастаючага пакалення, служыць умацаванню міжнацыянальнай і міжканфесійнай згоды”, — заявіў Кадлубай. Намеснік міністра падкрэсліў важнасць з’яўлення такога дапаможніка ва ўмовах “развязвання інфармацыйнай і гібрыднай войн” супраць народаў Беларусі і РФ.

Паводле яго слоў, ужо распрацаваны дапаможнік “Гісторыя Вялікай Айчыннай вайны”, ён стаў першым у серыі “Расія і Беларусь: старонкі агульнай гісторыі”.

Па выніках X Форуму рэгіёнаў Беларусі і Расіі, што прайшоў сёлета 26–28 чэрвеня ва Уфе (Башкартастан, РФ), быў падпісаны дакумент, у якім верхнія палаты парламентаў абедзвюх краін рэкамендавалі сваім урадам “распрацаваць агульны навукова абгрунтаваны гістарычны стандарт, які ўтрымлівае канцэптуальныя ацэнкі гістарычных падзей і асоб, а таксама агульныя падыходы да выкладання гісторыі”.